मातातीर्थमा आगलागीः ठेकेदारको लापरवाही वा नियोजित षड्यन्त्र ?

काठमाडौँ । काठमाडौँको मातातीर्थ सबस्टेशनमा आइतबार दिउँसो अचानक भएको आगलागीका कारण अवरुद्ध भएको विद्युत आपूर्ति क्रमशः पुनः सुचारु हुँदैछ । नेपाल विद्युत प्राधिकरणका कार्यकारी निर्देशक हितेन्द्रदेव शाक्यका अनुसार तीन दिनभित्र सबै प्रभावित क्षेत्रमा आपूर्ति पूर्णरूपमा पूर्ववत हुनेछ ।

ब्रेकर प्यानलको स्वीच सञ्चालन गर्दा स्पार्क भई आगलागी भएको प्रारम्भिक अनुमान गरिएको छ । तर यो ठेकेदारको लापरवाहीबाट मात्रै हो कि कसैले जानीबुझी गराएको हो भन्ने विषयमा तीन सदस्यीय छानबिन समिति गठन गरी सत्यतथ्य पत्ता लगाइने प्राधिकरणले जनाएको छ ।

‘घटनाको यथार्थ पत्ता लगाई दोषीमाथि कारबाही गरिनेछ’ शाक्यले बताए । उनका अनुसार, जलेका उपकरण निर्माण कम्पनीमार्फत् प्रतिस्थापन हुनेछन् भने तत्कालका लागि स्युचाटार सबस्टेशनबाट सेवा रिरोटिङ गरी अधिकांश क्षेत्रमा आपूर्ति बहाल गरिएको छ ।

बूढानीलकण्ठ र चपली सबस्टेशनबाट स्वीचगियर ल्याएर आवश्यक मर्मत कार्य तीव्र रूपमा अगाडि बढाइएको छ ।

आगलागीका कारण चन्द्रागिरी आसपासका क्षेत्रमा भएको विद्युत अवरुद्ध सोमबारबाट पुनः सञ्चालनमा आएको शाक्यले स्पष्ट पार्नुभयो ।

यस घटनाले काठमाडौँ उपत्यकामा निर्माणाधीन भूमिगत केबल प्रणालीको विश्वसनीयता र प्राविधिक सावधानीमाथि समेत प्रश्न उठाएको छ । प्रणालीको दीर्घकालीन स्थायित्वका लागि व्यापक मूल्यांकन र सुधार आवश्यक रहेको सरोकारवालाहरूको भनाइ छ ।