१० लाख रुपैयाँ भन्दा बढीको अबैध कपडासहित गाडी नियन्त्रणमा

काठमाडौं । बारा जिल्लाको जितपुर सिमरा उपमहानगरपालिका–२३ स्थित भलुवाही गाउँबाट चैत २४ गते सशस्त्र प्रहरीले करीब १० लाख ८ हजार रुपैयाँ बराबरको लत्ताकपडासहित गाडी नियन्त्रणमा लिएको छ ।

बा.प्र.०१–०२७ च ८५०३ नम्बरको टाटा पिकअप गाडीमा बीरगंज महानगरपालिका–१६ भुटनदेवी मन्दिर नजिकबाट लोड गरी जितपुर–सिमरातर्फ २० बोरा लत्ताकपडा लैजान लागेको भन्ने बिशेष सूचनाको आधारमा सशस्त्र प्रहरी बल नेपाल प्रस्तावित सीमा सुरक्षा गुल्म बीरगंजबाट सशस्त्र प्रहरी नायब उपरीक्षक लोकेन्द्र सुब्बाको कमाण्डमा खटिएको सुरक्षा फौजले भन्सारछलीको कपडा र गाडी नियन्त्रणमा लिएको हो ।

गाडीलाई पिछागर्दै आएपछी भलुवाहीमा गाडी छाडेर चालक फरार भएका थिए । बरामद गरिएको सर्टिङ सुटिङको कपडा तथा साडी र पिकअप आवश्यक कारबाहीका लागि बीरगंज भन्सार कार्यालयमा बुझाइएको छ ।

बरामद गाडीको भन्सार दाखिला मूल्य २५ लाख र लत्ताकपडाको मूल्य १० लाख ८ हजारसहित जम्मा भन्सार दाखिला मूल्य ३५ लाख ८ हजार कायम गरी भन्सार कार्यालयमा बुझाइएको हो ।