तीनकुनेमा तोडफोड र आगजनीः पूर्वराजा शाहलाई ७ लाख ९३ हजार जरिवाना तोकियो

काठमाडौं । शुक्रबार तीनकुने क्षेत्रमा आन्दोलनका नाममा भएको प्रदर्शनमा लुटपाट र आगजानी भएकोमा काठमाडौं महानगरपालिकाले पूर्वराजा ज्ञानेन्द्र शाहलाई जरिवाना तोकेको छ ।

महानगरपालिकाले ज्ञानेन्द्र शाहलाई नै तोकेर ७ लाख ९३ हजार रुपैयाँ जरिवाना गरेको छ । दुर्गा प्रसाई नेतृत्वको प्रदर्शनमा सहभागीहरुले महानगरका विभिन्न संरचना, दमकल, अग्नि नियन्त्रकहरूमाथि प्रहार गरेका थिए । दमकल लगायतका प्रहार गरेकाले महानगरले पूर्वराजा शाहलाई जरिवाना लगाउने निर्णय गरेको जनाएको छ ।

शनिबार काठमाडौं महानगरपालिकाको टोलीले तीनकुने–कोटेश्वर–जडिबुटी क्षेत्रमा भएको क्षतिको विवरण संकलन गरी त्यसमा लाग्ने खर्च र सरसफाइको शुल्क पनि पूर्वराजा शाहबाटै असुल गराउने निर्णय गरेको बताइएको छ ।

दुर्गा प्रसाईंको आह्वानमा शुक्रबार राजसंस्था पुनस्र्थापना गर्ने भन्दै तीनकुने क्षेत्रमा प्रदर्शन भएको थियो । जुन प्रदर्शनका क्रममा ब्यक्तिको घरमा आगजनी, भाटभटेनी सुपरमार्केटमा लुटपाट गर्नुका अलावा कान्तिपुर, अन्नपूर्ण दैनिकको कार्यालय तोडफोड गरेका थिए । नेकपा एकीकृत समाजवादी कार्यालय तोडफोड गर्ने, गाडीहरुमा आगजनी गरेका थिए ।

महानगरले तीनकुने, जडिबुटी, बालकुमारी, कोटेश्वर, सिनामंगल, कोटेश्वर महादेवस्थान क्षेत्रमा फोहोरमैला गरेकोमा प्रत्येक ठाउँको १ लाखका दरले जरिवाना तोकेको छ ।

तीनकुनेमा रुखबिरुवा नष्ट, रेलिङ तोडफोडबापत ४० हजार र आइल्याण्ड तोडफोड गरेबापत २३ हजार गरी ६३ हजार तिराउने गरी पत्र काटेको छ । साथै दमकल र अग्निनियन्त्रक फुटाएबापत १ लाख ३० हजार जरिवाना तोकेका छ ।

कुन कुन शीर्षकमा तोकियो जरिवाना ?