राजविराज । भारतीय सीमा सुरक्षा बल (एसएसबी)ले सप्तरीको खडग खोलाको पुल निर्माणमा रोक लगाएको छ । नेपाल भारत सीमा छुट्याउने पिलर भन्दा १९५ मिटर उतर नेपालतर्फ पुल निर्माण गर्ने योजना रहेपनि एसएसबीले आफूहरुलाई माथिल्लो निकायबाट निर्देश नआएसम्म पुल निर्माण गर्न नदिने बताएको छ ।
हुलाकी आयोजनाका इन्जिनयर आशुतोष कर्णका अनुसार हुलाकी राजमार्ग अन्तरगत रहेको कठौना–पातो–कटैया सडक खण्ड अन्तरगत डाकनेश्वरी नगरपालिका–६ कटैयामा रहेको अन्तिम बिन्दुमा पुल निर्माणमा एसएसबीले अवरोध गरेको हो ।
‘पिलर भन्दा १ सय ९५ मिटर नेपालतर्फ पुल निर्माणस्थल छ,’ इन्जिनयर कर्णले भने,‘जबरजस्ती एसएसबीले पुल निर्माण गर्न नदिने भएपछि निर्माण कार्य सुरु हुन नपाउँदै रोकिएको छ ।’
२०७६ साल माघ ८ गते उक्त पुल निर्माणका लागि काठमाडौंको इलाइट कम्पनीसँग सम्झौता भएको थियो । १८ करोड ३३ लाख रुपैयाँको लागतमा निर्माण हुने सो पुल निर्माण गर्न ३० महिनाको समयावधि तोकिएको छ ।
