कुलमानलाई हटाउने निर्णयको चौतर्फी बिरोध, सत्तापक्षकै नेताको आपत्ति

काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङलाई बर्खास्त गर्ने सोमबारको सरकारको निर्णयको चौतर्फी बिरोध भएको छ । सामाजिक संजालमा बहुसंख्यक नागरिकले कुलमानलाई हटाउने निर्णयको बिरोध गर्दै सरकारको चर्को आलोचना गरेका छन् ।

नेकपा(माओवादी) केन्द्रका अध्यक्ष तथा प्रमुख प्रतिपक्षी दलका नेता पुष्पकमल दाहाल ‘प्रचण्ड’ले घिसिङलाई हटाउने निर्णयको बिरोध गर्दै सामाजिक संजालमा सोमबारै लेखेका छन् । उनले सरकारको यो कदम बिल्कुल गलत र आपत्तिजनक भएको उल्लेख गरेका छन्–‘दुई तिहाई बहुमतको दम्भमा गरिएको यो निर्णयप्रति घोर निन्दा गर्दै यसको प्रतिरोध गर्न आग्रह गर्दछु ।’

बिपक्षी दलका नेता मात्र होइन, सत्तारुढ दल नेपाली कांग्रेसका महामन्त्रीद्वय गगनकुमार थापा र विश्वप्रकाश शर्माले समेत घिसिङलाई प्राधिकरणबाट हटाउने निर्णयको बिरोध गर्दै सामाजिक संजालमा लेखेका छन् । महामन्त्री थापाले त घिसिङ हटाउने निर्णयलाई उल्टो बाटो हिंडेको भनेका छन् । उनले लेखेका छन्–‘हामीले यस्तो नगरौँ है भन्दा सुनेको जस्तो पनि गर्ने तर निर्णय फेरि यस्तो गलत गर्ने ?

मन्त्रीहरूले बाटो बिराउँदा प्रधानमन्त्रीले समाल्नु पर्ने हो । तर विडम्बना त्यो भएन, निर्णय गलत छ,सरकार १ उल्टो बाटो हिँडेर सही गन्तव्य पुगिँदैन ।’

अर्का महामन्त्री शर्माले कुलमान घिसिङलाई पदबाट हटाउन काँग्रेस पदाधिकारी तहको सहमति नभएको उल्लेख गरेका छन् । उनले लेखेका छन्–बाँकी पदावधि काम गर्न दिन र नहटाउन आन्तरिक तथा सार्वजनिकरुपमै सजग गराइएको थियो ।

कारबाही योग्य केही भए, पछि पनि गर्न मिल्थ्यो । केही राम्रा प्रयास छायाँमा पार्नेगरी सरकारले कुलमान हटाउनु हुन्न थियो । सरकारको यो निर्णय समयोचित विल्कुलै भएन । असन्तुष्टिलाई निराशाको भास्य बनाएर, प्रतिगमनको खेती गर्नेहरुलाई निरुत्साहित गर्नुपर्ने बेलामा सरकारले गलत निर्णय जो लियो, यसप्रति खुला र प्रष्ट रूपमा विमति छ ।