पूर्वाधार विकास समितिको बैठक बस्दै, उर्जामन्त्री खड्काका बिरुद्ध परेका उजुरीबारे छलफल हुने

काठमाडौं । संघीय संसदको पूर्वाधार विकास समितिको बैठक बस्दैछ ।

संघीय संसद सचिवालयका अनुसार सो बैठक सिंहदरवारस्थित कार्यालयमा बस्नेछ । समितिका अनुसार सो बैठक बिहान ११ः३० बजेबाट सुरू हुनेछ ।

पूर्वाधार विकास समितिको बैठकमा समितिमा प्राप्त उजुरीमाथि ऊर्जा, जलस्रोत तथा सिंचाइ मन्त्रालयसँग छलफल हुने जनाइएको छ । ऊर्जामन्त्री दीपक खड्काले जगदुल्ला जलविद्युत आयोजनाको ठेक्कामा सेटिङ गरी प्रतिस्पर्धालाई सीमित बनाएको र सरकारी स्वामित्वका संखुवासभाको किमाथांका अरुण र मुगु कर्णाली आयोजना ब्यापारी विनोद चौधरी र उमेश श्रेष्ठलाई सिंत्तैमा दिन खोजेको बिषयमा परेका उजुरीमाथि छलफल हुने भएको छ ।

जगदुल्लामा मन्त्री खड्काले नै ठेकेदारहरुलाई चेक बाँडेको उजुरी अख्तियार दुरुपयोग अनुसन्धान आयोगमा परेकोले रद्द भई पुनः टेण्डर भइसकेको छ । किमाथांका अरुण र मुगु कर्णाली पनि ब्यापारीलाई सुम्पने निर्णयबाट ऊर्जा मन्त्रालय पछि हटिसकेको छ ।