दुवाडी गृहसचिवमा पक्का, विनोद सिंह र पुस्करको चाहना अधुरै

काठमाडौं । एकनारायण अर्याल मुख्यसचिव भएपछि रिक्त गृहमन्त्रालयको सचिवमा नारायण शर्मा दुवाडीले मौका पाउने भएका छन् । दुवाडी हाल राष्ट्रपति कार्यालयमा कार्यरत छन् ।   गृहमन्त्री रमेश लेखकले उनलाई गृहमन्त्रालयको सचिव बनाउन लागेका हुन् । दुवाडी गएको साउन १४ मा २२ सचिवको सरुवामा प्रधानमन्त्री कार्यालयबाट राष्ट्रपति कार्यालयमा खटाइएका थिए ।

राष्ट्रपति कार्यालयमा सरुवा भएपछि उनले पीएसओ मागेर हैरान पारेका थिए । सेरोमोनियल राष्ट्रपतिको सुरक्षार्थ नेपाल प्रहरीबाट प्रहरी निरीक्षकको नेतृत्वमा टोली खटिएकोमा केही दिनअघि सेटै परिवर्तन भएको थियो । नयाँ आएका इन्स्पेक्टरसँग उनले पीएसओ मागेर हैरान बनाएका थिए । राष्ट्रपतिका लागि प्रहरी निरीक्षकको नेतृत्वमा सुरक्षाकर्मी तैनाथ भएपनि सचिवका लागि पीएसओ दिन कानुनतः नमिल्ने कुरा थाहा भए पनि उनले किन मागेका हुन् भनेर सचिवालयका कर्मचारीहरु नै चकित परेका थिए ।

राष्ट्रपति कार्यालयमा पीएसओ नपाएका उनी अब ७७ हजार प्रहरीदेखि ३७ हजार सशस्त्र प्रहरीकै खटनपटन गर्ने गृहमन्त्रालयको प्रशासनिक नेतृत्व गर्ने भएका छन् । यसअघि बाणिज्य मन्त्रालय र सुदूरपश्चिम प्रदेशको प्रमुख सचिव भइसकेका दुवाडी निर्णय क्षमता भएकाभित्र भने पर्दैनन् । सुदूरपश्चिम घर भएका महलेखा नियन्त्रक विनोदप्रकाश सिंह र त्यही भूगोलमा ससुराली भएका कृष्णहरि पुस्करले गृहमन्त्रालयमा जानका लागि सबै शक्ति लगाउँदा पनि दुवाडीले बाजी मार्ने भएका छन् ।

विनोदप्रकाश सिंह टेरामक्स खरिदको घोटालामा कुनै पनि बेला मुद्दा जानसक्ने भनेर गृहमा लाने कुरामा मन्त्री लेखक पछि हटेका छन् । पुस्करलाई पनि मन्त्रीले त्यति नरुचाउँदा दुवाडीले बाजी मार्ने भएका छन् । पुस्करले त सचिव बढुवा हुनासाथ प्रदेशमा पदस्थापन नभई गृहमन्त्रालयमा हुने भन्ने ग्यारेन्टी गरेका थिए । तर गृहमा होइन, आरजु राणाको कृपाले उनी राजस्व सचिव हुने मौका पाएका थिए । तर उनले तीन बर्षसम्म पनि गृहमा जाने धोको पूरा गर्न पाउने संभावना कम छ ।