कैलाली । बैतडीमा बलात्कारको घटनामा मिलापत्र गराएको आरोपमा एकजना वडाध्यक्ष पक्राउ परेका छन् । पक्राउ पर्नेमा सिगास गाउँपालिका ३ का वडाध्यक्ष शेरसिंह साउद रहेका छन्।
जिल्ला प्रहरी कार्यालय बैतडीले १८ वर्षीया किशोरी बलात्कारको घटनामा मिलापत्र गराएको भन्दै साउदलाई पक्राउ गरेको हो ।
१८ वर्षीया किशोरीमाथि गत जेठमै बलात्कार भएको र गत असार १४ गते गाउँमै तमसुक बनाएर घटना मिलाइएको थियो । तमसुकमा पीडित पक्षलाई कात्तिक मसान्तभित्र एक तोला सुन दिने भनिएको थियो ।
बलात्कार जस्तो जघन्य अपराध मिलापत्र गरेर गाउँमै लुकाउने भूमिकामा रहेको भन्दै वडाध्यक्ष साउदलाई पक्राउ गरिएको जिल्ला प्रहरी कार्यालयका प्रमुख प्रहरी नायव उपरीक्षक नारायणप्रसाद अधिकारीले जानकारी दिए ।
