गृहमन्त्री लामिछाने र महान्यायाधीवक्ता पोखरेलबिरुद्धको रिट दर्ता गर्न आदेश

काठमाडौं । सर्वोच्च अदालतले उपप्रधान तथा गृहमन्त्री रवि लामिछाने र महान्यायाधिवक्ता डा. दीनमणि पोखरेलविरुद्ध पेश भएको रिट निवेदन दर्ता गर्न आदेश दिएको छ ।

सर्वोच्च अदालत प्रशासनले गृहमन्त्री लामिछाने र महान्यायाधिवक्ता विरुद्ध अधिवक्ता अनुपम भट्टराईले गरेको रिट निवेदन दर्ता नगरी दरपीठ गरेको थियो । दरपीठबिरुद्ध दिएको निवेदनमा सुनुवाइ गर्दै बुधबार न्यायाधीश टेकप्रसाद ढुंगानाले रिट दर्ता गर्न आदेश दिएका छन् ।

महान्यायाधीवक्ता पोखरेलले गृहमन्त्री लामिछानेका बिरुद्ध सहकारी ठगी लगायतका कुनै पनि उजुरी नपरेको भनी गएको बैशाखमा पत्र लेखेपछि उनी विवादमा तानिएका थिए ।

तल्ला निकायहरुमा अनुसन्धान भएको र हुनसक्ने विषयमा कुनै व्यक्तिले निवेदन दिएको भरमा छानबिन भएको छ वा छैन भनी पत्र जारी गर्दा त्यसको दुरुपयोग हुनसक्ने भन्दै अधिवक्ता भट्टराईले महान्यायाधिवक्ता कार्यालयबाट जारी भएको पत्र बदर हुनुपर्ने माग राखेका थिए ।

सर्वोच्च अदालतको आदेशपछि अधिवक्ता भट्टराईको रिट आइतबार दर्ता हुने भएको छ ।