प्रदेश सांसदका पीए कुटिए, तीन गुण्डा नाइकेबिरुद्ध बिन्दु थापाले दिए जाहेरी

कास्की । गण्डकी प्रदेशसभाका प्रभावशाली सांसद तथा पूर्वमन्त्री बिन्दुकुमार थापामाथि नै गुण्डानाइकेहरुको समूहले आक्रमणको प्रयास गरेको छ । गएको निर्वाचनमा कास्की क्षेत्र नम्बर २ (ख) बाट निर्वाचित सांसद थापाले गुण्डानाइकेले आक्रमण गरेको जाहेरी लिएर प्रहरीमा जानुपरेको छ ।

सांसद थापा पोखराका ब्यापारी पनि हुन् । अनुमतिबिना नै गुण्डनाइके बिक्रम लामा, धनबहादुर छन्त्याल(लक्ष्मण) र सागर रानाभाटको समूहले केही दिनअघि लेखनाथमा जग्गा प्लटिङ गर्न सुरु गरेको बिषयमा सांसद थापाका पीए गोपाल नेपालीले सोधखोज गरेका थिए । उनीहरुले सांसद थापाको सँगै जोडिएको जगा अनधिकृत रुपमा प्लटिङ गर्न सुरु गरेका थिए । अनुमतिविना प्लटिङ गर्नु गैरकानुनी हो, गर्न मिल्दैन भनेर नेपालीले भन्नासाथ उनीमाथि आक्रमण भएको थियो । नेपालीमाथि आक्रमण गर्ने सागर रानाभाट नेपाली कांग्रेसनिकट गुण्डा हुन् ।

सांसद थापाको जग्गासँग सीमा जोडिएको जमिनमा अनुमति नलिई उनीहरुले प्लटिङ सुरु गरेपछि नेपालीले सोध्नासाथ उनीमाथि सांघातिक आक्रमण गरिएको थियो । नेपालीलाई सागर रानाभाटले एक्कासी मुखमा मुक्का प्रहार गरेका थिए । सागर रानाभाटले नेपालीमाथि ‘तेरो जग्गा हो ?’ भन्दै दाँत नै भाँचिनेगरी मुक्का प्रहार गरेका थिए । सांसद बिन्दु थापाले किन कुटेको भनेर प्रश्न गर्दा उनीमाथि नै ज्यान मार्ने धम्की गुण्डानाइकेको समूहले दिएको थियो । धम्कीमात्र होइन, मिलाउनका लागि करोडौं रकम बार्गेनिङ गरेपछि सांसद थापा प्रहरी प्रशासन गुहार्न पुगेको प्रहरी स्रोत बताउँछ ।

थापाले जाहेरी दिएपछि प्रहरीले आक्रमणकारी सागर रानाभाटलाई पक्राउ गरेको छ । लामा र छन्त्याल फरार भएका छन् । यी तीनैै जना गुण्डानाइकेको संरक्षण पोखरा महानगरपालिका वडा नम्बर २६ का वडाध्यक्ष नरेन्द्र थापा र क्याटवाक क्लवका संचालक गुप्ता लामाले गर्दैआएका छन् । दानबहादुर कार्की कास्कीको एसपी हुँदा गुण्डागर्दीमा संलग्न धनबहादुर छन्त्याल (लक्ष्मण) लाई पक्राउ गर्न खोज्दा गुप्ता लामाले नै सेटिङ गरी दुबई भगाएका थिए । ७ बर्षअघि छन्त्याल पोखराको एक हाउजिङ कम्पनीसँग ५ करोड फिरौती मागेको आरोपमा पक्राउ पनि गरेको थियो । हाउजिङ व्यापारी तथा रुपाकोट होटलका सञ्चालक पुष्पराज अधिकारीसँग लक्ष्मणले पोखरामा व्यापार गर्नु छ भनी ५ करोड मागेका थिए ।

सांसद थापामाथि आक्रमणको प्रयास गरेको, ज्यान मार्ने धम्की दिएको, करोडौं रकम मागेको र उनका पीएलाई सांघातिक आक्रमणको जाहेरी परेको बिषयमा प्रतिक्रियाका लागि जिल्ला प्रहरी कार्यालय कास्कीका प्रमुख एसपी मोहन थापासँग पटक पटक प्रयास गर्दा पनि उनी सम्पर्कमा आउन चाहेनन् ।

को हुन् विक्रम लामा ?

पोखरामा बिक्रम लामाको गुण्डागर्दी यति चरम सीमामा पुगेको छ कि उनको ज्यादतिका बिरुद्ध कोही पनि ज्यान खतरामा पर्ने भयले उजुरीसम्म गर्न डराउने गरेको स्रोत बताउँछ । हातहतियार, लागूऔषध तथा बैंक लुटपाट मुद्दामा जेल सजाय भोगेर करिब दुई वर्षअघि छुटेका गुण्डा नाइके विक्रम लामाले पोखरामा व्यवसायीमाथि आक्रमण गर्दा समेत उनलाई प्रहरीले पक्राउ नगरी उन्मुक्ति दिएको थियो ।

रिठ्ठेपानीमा रहेको रेशम एग्रो इन्डस्ट्रीज प्रा.लि. का सञ्चालक रेशम कुमालले बैंक, सहकारी र विभिन्न व्यक्तिहरुसँग गरी झण्डै ३५ करोड उठाएर तिर्नुपर्ने व्यक्तिहरुलाई गुण्डा नाइके लामामार्फत् धम्की दिंदै आएको भन्दै जिल्ला प्रशासन कार्यालय कास्कीमा २०८० असारमा केही पीडितहरुले उजुरी दिएका थिए । तर जिल्ला प्रहरी कार्यालय कास्कीका तत्कालीन एसपी अजय केसीले उनलाई पक्राउ गर्नुको साटो उल्टै संरक्षण गरेका थिए ।

कुमालले गुण्डागर्दी शैलीमा पैसा फिर्ता नगरी कहिले दीपक मनाङ्गे त विक्रम लामालाई सँगै राखेर ऋण तिर्नुपर्ने व्यक्तिहरुलाई तर्साउने गरेको बिषयमा प्रहरीमा जाहेरी दिंदा पनि तत्कालीन एसपी केसीले लामालाई पक्राउ नगरी संरक्षण गरेका थिए ।

प्रहरीले जाहेरी लिन नमानेपछि जिल्ला प्रशासन कार्यालय कास्कीमा कारबाहीको माग गर्दै पीडितले निवेदन दिएपछि कुमालले बिक्रम लामामार्फत् धम्क्याएका थिए । जिल्ला प्रशासन कार्यालय कास्कीले कुमाल र विक्रम लामालाई पक्राउ गर्न निर्देशन दिंदा पनि तत्कालीन एसपी अजय केसीले त्यसको पालना गर्न उदासिनता देखाएका थिए । पोखरामा कुमालले गरेका अबैध असुलीको संरक्षण बिक्रम लामाले गर्दैआएका छन् ।

हतियार, लागूऔषध मुद्दा र बैंक लुटपाटमा ८ बर्ष जेल बसेर निस्केका गुण्डानाइके बिक्रम लामालाई प्रहरीमा सेटिङ मिलाएर गुप्ता लामा र वडाध्यक्ष नरेन्द्र थापाले जोगाउँदैआएका छन् । लेखनाथ र पोखरा आसपासका क्षेत्रमा जग्गा प्लटिङ, सडक निर्माणका ठेकेदारसँग धम्क्याएर पैसा उठाउने विक्रमलाई जोगाउन प्रहरीमा सेटिङ मिलाउने गुप्ता लामा हुन् । सांसद थापामाथि भएको आक्रमणपछि पनि गुप्ता लामाले नै उनलाई लुकाएको आशंका गरिएको छ ।