सिन्धुपाल्चोक उद्योग–बाणिज्य संघको अधिवेशनः अध्यक्षमा कस कसले गर्दैछन् दाबी

बाह्रबीसे । सिन्धुपाल्चोक उद्योग बाणिज्य संघको २६ औं साधारणसभा एवं एघारौं अधिवेशन आगामी चैत ९ र १० गते हुँदैछ । संघको अधिवेशनले नयाँ नेतृत्व चयन गर्दैछ । संघको अध्यक्षका लागि अमृत कार्की, शम्भु तिमल्सिना, सुमन खत्री र बुद्धराज बस्नेतले उम्मेदवारी घोषणा गरेका छन् । अमृत कार्की वर्तमान उपाध्यक्षहुन् ।  तिमल्सिना वर्तमान महासचिव हुन् ।

खत्री बिष्णु खत्रीका भाइ भएकाले उनले उम्मेदवारी दिन पाएमा उनी बलिया दाबेदार हुन् । सुमन खत्री अघिल्लो कार्यसमितिमा मानार्थ उपाध्यक्ष थिए । सुमन खत्री पूर्वअध्यक्ष बिष्णु खत्रीको भाइ भएकै कारण उनी ओझेलमा पर्दैआएका छन् । अध्यक्षका दाबेदारहरुमध्ये आफ्नै ब्रान्डमा ब्यापार गर्ने खत्री एकमात्र ब्यापारी हुन् । प्रहरीका उच्च अधिकारीदेखि अर्थप्रशासनको उच्च तहसम्म खत्रीको पहुँच छ ।

बुद्धराज बस्नेत २०७३ कांग्रेसबाट माओवादी भएका र २०७९ मा फेरि कांग्रेस छाडेका पात्र हुन् । उनी संघका पूर्वपदाधिकारी हुन् । उनलाई कुनै हालतमा उद्योग बाणिज्य संघको अध्यक्ष हुन नदिन बाह्रबीसे नगरपालिकाका मेयर बालकृष्ण बस्नेत नै लागेका छन् । माओवादी छाडेका उनलाई कांग्रेसको पनि साथ नभएपछि उनको संभावना कम देखिन्छ । ब्यापारीको हितमा अहिलेसम्म कुनै लबिङ नगरेका र आफ्नो मात्र स्वार्थपूर्ति गर्ने ब्यक्तिका रुपमा बस्नेत चिनिन्छन् । ब्यापारीले पेशागत हितका लागि राखेको बैठक छाडेर हिंड्ने पात्रका रुपमा उनी चिनिन्छन् ।

उद्योग बाणिज्य संघको चुनावमा पनि दलीय प्रभाव जबर्जस्त देखिने भएकाले अवसरवादका पर्यायहरु नेतृत्वमा आउने संभावना क्षीण रहेको संघकै एक पदाधिकारी बताउँछन् । यद्यपि संघका वर्तमान अध्यक्ष होमबहादुर बस्नेत (राजकुमार) भने बुद्धको पक्षमा लचिला देखिएका छन् । उनका भाइ सुदिप बस्नेतले बुद्धराजको पक्षमा फेसबुकमा लेखेका छन् ।

अर्थमन्त्री डा. प्रकाशशरण महतका भान्जा नाता पर्ने अरुण थापाको नाम लिंदै रसुवा भन्सारमा तस्करीको सेटिङ गर्छु भनेर क्यारिङवालाहरुलाई बस्नेत दुःख दिंदै आएका छन् । संघको सचिवमा इश्वर गुभाजुले दाबी गरेका छन् । उनी माओवादी निकट हुन् । र, सिन्धुपाल्चोका सांसद माधव सापकोटा ‘सुबोध’ का ब्यापारिक पार्टनर हुन् ।