रेडियो कार्यक्रममार्फत चिनजान, विवाह गर्न दबाबपछि हत्या

काठमाडौं । काठमाडौंको गौशालास्थित सिराहा धनुषा होटल एण्ड लजमा माघ २७ गते मृत अवस्थामा फेला परेकी प्रमिला दमाईको विवाहेत्तर सम्बन्धका कारण हत्या भएको खुलेको छ । आज पत्रकार सम्मेलन गर्दै जिल्ला प्रहरी परिसर काठमाडौंले सो घटनाबारे जानकारी गराएको हो ।

उनको हत्या आरोपमा दोलखा वैद्येश्वर गाउँपालिका-७ घर भई अहिले काठमाडौं डेरा गरी बस्ने कुमार श्रेष्ठलाई प्रहरीले पक्राउ गरी अनुसन्धान सुरु गरेको छ ।

प्रहरीकाअनुसार प्रमिला र कुमारबीच दोलखाको एक रेडियो कार्यक्रममार्फत चिनजान भएको थियो । दुवै विवाहित रहेको प्रहरीले बताएको छ। पछिल्लो समय प्रमिलाले आफूसँग विवाह गर्न दबाब दिएपछि कुमारले हत्या गरेको प्रारम्भिक अनुसन्धानबाट खुलेको प्रहरीको जनाएको छ ।