नेपाललाई शैक्षिक ‘हब’ बनाउनुपर्छ, सम्भावना छ : प्रधानमन्त्री प्रचण्ड

काठमाडौं । प्रधानमन्त्री पुष्पकमल दाहाल ‘प्रचण्ड’ ले नेपाललाई शैक्षिक हब बनाउनुपर्ने उल्लेख गरेका छन् ।

कर्णाली स्वास्थ्य विज्ञान प्रतिष्ठानको नवौं सभालाई आज बिहान सम्बोधन गर्दै प्रधानमन्त्री प्रचण्डले त्यसको सम्भावनासमेत रहेको बताएका छन् ।

“नेपाललाई उच्च शिक्षाको हब बनाउनुपर्छ भन्ने मेरो प्रष्ट मान्यता छ । यो हाम्रो आकांक्षा मात्र होइन, महत्त्वपूर्ण सम्भावनाको क्षेत्र पनि हो,” उनले भने ।

कर्णाली स्वास्थ्य विज्ञान प्रतिष्ठानमा अध्ययनका लागि विदेशबाट समेत विद्यार्थीहरू आउन थालेको र आफूलाई त्यसप्रति खुसी लागेको उनले बताए । “विदेशबाट समेत विद्यार्थीहरू आएको जानकारी पाएँ, निकै खुसी लागेको छ,” उनले भने ।

त्यस्तै आगामी दिनमा प्रतिष्ठानले थप प्रगति गर्ने विश्वास व्यक्त गर्दै प्रचण्डले प्रतिष्ठानबाट कर्णाली प्रदेश र सुदूरपश्चिम प्रदेशका अति पिछडिएका क्षेत्रका जनतालाई प्रत्यक्ष सेवा प्रवाह हुनुका साथै दक्ष जनशक्ति उत्पादन पनि भइरहेको प्रष्ट पारे ।