गृहमन्त्री श्रेष्ठ भन्छन्- मन्त्रीको गाडी घेराबन्दीमा छ भन्ने रिपोर्टिङ भएपछि गोली चल्यो

काठमाडौँ। उपप्रधान मन्त्रीसमेत रहेका गृहमन्त्री नारायणकाजी श्रेष्ठले आज प्रतिनिधि सभाको राज्यव्यवस्था तथा सुशासन समितिको बैठकमा बालकुमारी घटनामा भौतिक पूर्वाधार तथा यातायात मन्त्री प्रकाश ज्वालाको गाडी घेराबन्दीमा छ भन्ने रिपोर्टिङ भएपछि प्रहरीले गोली चलाएको बताएका छन्।

उक्त बैठकमा बालकुमारी धरपकडबारे जानकारी दिँदै गृहमन्त्री श्रेष्ठले आन्दोलन भइरहेकै ठाउँमा मन्त्रीको गाडी आएको र घेराबन्दीमा परेको भनिएपछि प्रहरीले गोली चलाएको बताएका हुन्।

बैठकमा गृहमन्त्री श्रेष्ठले घटना हुनुमा इपिएस कार्यालयको लापरबाही, मन्त्रीको गाडी आन्दोलन भइरहेकै ठाउँबाट लैजाने पिएसओको निर्णय र सुरक्षाकर्मीको कमजोरी मुख्य कारण रहेको बताए।

‘इपिएस कार्यालयले भएकै नियमावलीअन्तर्गत सिपिङमा फेल भएकालाई उत्पादनमा नपठाउने नीति नलिएको देखिन्छ। अदालतको आदेशलाई कन्जरभेटिभ इन्टरपिटेसनबाट १८ जनालाई मात्रै दिने भनेको छ, त्यसले २८ हजारलाई नकरात्मक प्रभाव पार्‍यो। इपिएसको विवेकसम्मत निर्णय भएन कि भन्ने छ,’ मन्त्री श्रेष्ठले भने, ‘गृह मन्त्रालयका शान्ति सुरक्षा प्रमुखले इपिएसका प्रमुखलाई बोलाएर के छ भनेर बुझ्दा केही छैन तीन बजेसम्म बस्छन् जान्छन् भनेर हल्का हिसाबले जवाफ दिएको रिपोर्टिङ गृहमन्त्रालयसँग छ। उहाँको त्यो जवाफ हामीलाई उपयुक्त लागेको छैन।’

संसदीय समितिलाई जवाफ दिने क्रममा गृहमन्त्री श्रेष्ठले आन्दोलन भइरहेकै ठाउँबाट मन्त्रीको गाडी लैजान खोज्नु पिसओको गम्भीर त्रुटि भएको बताए। उनले मन्त्री ज्वालाको गाडि त्यही बाटो नगएको भए स्थिति यस्तो नबन्ने बताएका छन्।

‘बालकुमारीनजिकै मन्त्रीज्यूको पार्टीको मिटिङ रहेछ। उहाँ मन्त्रालय जान्छु भनेर त्यही बाटो आउनुभएछ। उहाँ त्यस्तो बेला त्यही बाटोबाट किन आउनुभएको होला? बडी गार्ड छ, पिसओ छ। सामान्यत पिसओले बाटो पहिले चेक गर्छ। कन्ट्रोल रूमबाट भएको निर्देशन पनि सुनेको हुन्छ। आर्मीको सेक्युरिटी गार्ड र पिसओकोले किन रोकेनन होला?’ मन्त्री श्रेष्ठले भने, ‘त्यसले अझ भूमिका खेलेको छ। तयसअघि प्रहरी अलिअलि लाठी चार्ज गरेको थियो। मन्त्रीज्यू बाहिर निस्केर सवालजवाफतिर पनि लाग्नुभएछ,धकेला धकेल भएछ। त्यसपछि आर्मीको बडिगार्डले उहाँलाई त्यहाँबाट निकाल्नुभएछ। उहाँ फर्किएरपहिले बैठक गरेको ठाउँमा पुग्नुभयो।’

उनले मन्त्रीको गाडी आएको छ र घेराबन्दीमा परेको छ भनेपछि त्यही क्रममा गोली प्रहार भएको देखिएको बताएका छन्। ‘एक जनालाई गोली लागेको छ, अर्कोको निलडाम छ टियर ग्यासले लागेको हो कि के हतियारले नजिकबाट लागेको हो छानविन हुँदै छ,’ मन्त्री श्रेष्ठले भने।