अर्थतन्त्रमा हुँदै नभएको संकट भनेर जनतालाई आतंकित बनाउने काम गरेको प्रधानमन्त्रीकाे आरोप

काठमाडौं। प्रधानमन्त्री पुष्पकमल दाहाल प्रचण्डले अर्थतन्त्रमा हुँदै नभएको संकट भनेर जनतालाई आतंकित बनाउने काम गरेको आरोप लगाएका छन् । आज धनगढीमा आयोजित सुदूरपश्चिम महत्वसलाई सम्बोधन गर्दै उनले यस्तो बताएका हुन् ।

अर्थतन्त्र दबाबमा भएपनि केही महिनाभित्र लयमा जाने उनको विश्वास छ । सरकार, निजी क्षेत्र, विज्ञबाट समेत बिस्तारै अर्थतन्त्रले लय पक्रिने सकारात्मक संकेत देखा परेको बताएका उनको जिकिर छ ।

‘केही नकारात्मक चिन्तन बोकेकाले हुँदै नभएको संकटलाई संकट–संकट भनेर जतालाई आतंकित गर्ने प्रयास गरेका छन् । अर्कोतर्फ सरकार, निजी क्षेत्र र विज्ञहरूबाट अर्थतन्त्रले बिस्तारै लय पक्रिन लागेको संकेत देखिएको बताउँदै आएका छन्’, प्रधानमन्त्रीले भने, ‘अझै अर्थतन्त्र केही दबाबमा रहेता पनि आत्तिनुपर्ने अवस्था छैन । बिस्तारै लयमा जाँदै छ । विदेशी मुद्रा संचिति बढ्दै गएको छ । रिमिट्यान्स वृद्धि हुँदै गएको छ । त्यसकारण अराजक नकारात्मक सोच भएकाहरूले भ्रम छर्ने काम गरेका छन् ।’

त्यस्तै राष्ट्र बैंकले गरेको मौद्रिक नीतिको समीक्षाले अर्थतन्त्र सुधारका लागि महत्त्वपूर्ण भूमिका खेल्ने उनले विश्वास गरे । उनले अर्थतन्त्र सुधारका लागि आफूले यसअघि नै मौद्रिक नीतिसम्बन्धी बोर्डको बैठकले सरकारका सम्बन्धित निकाय, निजी क्षेत्रका प्रतिनिधिहरू, अर्थतन्त्रका विज्ञहरू, प्रतिपक्ष र सत्ता पक्षलाई बोलाएर गम्भीर छलफल गरेर केही निष्कर्ष निकालेको जिकिर गरे ।