अहिलेको निर्वाचन प्रणालीअनुसार एकल बहुमत ल्याउन मुस्किल छ: देउवा

काठमाडौं। नेपाली कांग्रेसका सभापति शेरबहादुर देउवाले पार्टी एकताबद्ध भए चुनावमा बहुमत ल्याउन सक्ने बताएका छन्। आज ओखलढुंगामा कांग्रेसको जिल्ला सम्मेलन तथा बीपी स्मृति भवन उद्घाटन गर्दै सभापति देउवाले यस्तो बताएका हुन् ।

उनले अहिलेको निर्वाचन प्रणालीअनुसार एकल बहुमत ल्याउन पार्टीलाई मुस्किल समेत पर्ने बताए ।

‘अहिले हाम्रो पार्टीको मात्रै सरकार बन्ने अवस्था छैन । एउटा पार्टीको मात्र बहुमत ल्याउन अलि गाह्रो छ । तैपनि पार्टी एकताबद्ध भए बहुमत ल्याउन सकिन्छ,’ देउवाले भने, ‘बहुमत ल्याए कांग्रेसले चाहे जसरी काम गर्न सक्छ ।’

देशको विकास जसरी अगाडि बढ्नुपर्ने त्यसरी हुन नसकेको देउवाको भनाइ छ । संघीयताले सबैको चाहना र भावना बमोजिमको विकास गर्न नसकेको उनले बताए ।