भक्तपुर र मकवानपुरमा भएका छुट्टाछुट्टै दुर्घटनामा दुई जनाको मृत्यु

काठमाण्डाै । भक्तपुर र मकवानपुरमा भएका छुट्टाछुट्टै दुर्घटनामा दुई जनाको मृत्यु भएको छ ।

भक्तपुरको सूर्यविनायक नगरपालिका–५ श्रृजनानगर चोकमा बा ९७ प २९५० नम्बरको मोटरसाइकल टिपरमा ठोक्किएर भएको दुर्घटनामा मोटरसाइकलको पछाडि बसेका सिन्धुपाल्चोक चौतारा साँगागढी नगरपालिका–८ घर भइ सूर्यविनायक नगरपालिकाको दार्जिलिङ हाइट बस्ने वर्ष २३ का रामशरण थापामगरको ज्यान गएको प्रहरीले जनाएको छ ।

गएराति भएको दुर्घटनामा घाइते भएका मोटरसाइकल चालक शिव आलेमगरको मध्यपुर अस्पतालमा उपचार भैरहेको छ । यस्तै, मकवानपुरको थाहा नगरपालिका–१ कुन्छालमा आज बिहान भएको दुर्घटना एक जनाको ज्यान गएको छ ।

ना ६ ख ३९८७ नम्बरको कन्टेनर त्रिभुवन राजपथ सडक खण्ड अन्तर्गत कुन्छालमा दुर्घटना हुँदा नुवाकोटको बेलकोट नगरपालिका–५ का ४२ वर्षका दीप श्रेष्ठको ज्यान गएको जिल्ला प्रहरी कार्यालय मकवानपुरका प्रहरी नायब उपरीक्षक लक्ष्मी भण्डारीले जानकारी दिए ।