भेरी नदीमा फेला परेको शव मेजर पण्डितको हुन सक्ने आशंका

सुर्खेत । डोल्पाको खदाङ्ग भेरी नदीमा एकजनाको शव भेटिएको छ । डाेल्पाकाे त्रिपुरासुन्दरी नगरपालिका ५ खदाङ्ग तिम्ले बगर भेरी नदीमा भेटिएकाे उक्त शवको पहिचान भने खुलेको छैन । तर, केही दिनअघि डोल्पा सदरमुकाम दुनैस्थित नन्दबक्स गणका गुल्मपती मेजर विमल पण्डित सम्पर्कविहीन भएका थिए । उक्त शव हराइरहेका डोल्पाका मेजर बिमल पण्डितको हुन सक्ने आशंका गरिएको छ ।

घटनास्थलबाट उक्त शव जिल्ला अस्पताल दुनै ल्याइँदै गरेकाे डोल्पाका प्रमुख जिल्ला अधिकारी भुमिश्वर पोखरेलले बताए ।

मेजर पण्डित यही भदौ १० मा त्रिपुराकोटबाट सम्पर्कविहीन भएका थिए । ३८ वर्षीय पण्डित सम्पर्कविहीन भएको १७ दिन पुगेको छ ।

प्रमुख जिल्ला अधिकारी पोखरेलले भने, ‘भेरी नदीमा भेटिएको लाशको भने पहिचान हुन सकेको छैन । मेजर पण्डितको लाश हो कि भन्ने आशंका भने गरेका छौं । अनुसन्धान भइरहेको छ ।’