मोटरसाइकल दुर्घटना हुँदा २ जनाको मृत्यु,एक घाइते

राजविराज। सप्तरीको सखडा सडक खण्डमा आज शुक्रबार अपराह्न भएको मोटरसाइकल दुर्घटनामा २ जनाको मृत्यु भएको छ। त्यहि दुर्घटनामा एक जना घाइते भएका छन् ।

मृत्यु हुनेहरुमा छिन्नमस्ता ३ का १८ वर्षीय श्यामकुमार यादव र ३० वर्षीय विकासकुमार खंग रहेको प्रहरीले जनाएको छ । दुर्घटनामा परी सख्त घाइते भएका श्यामकुमार र विकासकुमारलाई उपचारका लागि राजविराजस्थित छिन्नमस्ता अस्पताल ल्याइएकोमा उपचारका क्रममा दुबै जनाको मृत्यु भएको हो ।

दुर्घटनामा स्थानीय अजयकुमार खंग घाइते भएका छन् । राजविराजबाट सखडातर्फ जाँदै गरेको प्र २–०१–००२–प २५६० नम्बरको मोटरसाइकल छिन्नमस्ता ३ स्थित नर्सिङ थान नजिकै बिजुलीको पोलमा ठोक्किएर दुर्घटना भएको हो ।

मोटरसाइकलमा तीन जना सवार थिए । घाइते अजयको स्थानीय क्लिनिकमा उपचार भइरहेको प्रहरीले जनाएको छ ।