नेप्स आज दोहोरो अंकले बढ्यो

काठमाडौं । आज सेयर बजारमा दोहोरो अंकले वृद्धि भएको छ । नेपाल राष्ट्र बैंकले त्रैमासिक रुपमा आधार दरमा भएको परिवर्तन अनुसार मासिक रुपमा नै कर्जाको ब्याजदर घटाउन सक्ने व्यवस्था गरेको थियो ।

घट्दो आधार दरमा मासिक रुपमा ब्याजदर परिवर्तन गर्न पाइने भएपछि कर्जाको ब्याजदर घट्ने आशामा मंगलबार सेयर बजारमा लगानीकर्ताले सकारात्मक प्रतिक्रिया जनाएका छन् ।

अघिल्लो दिन आइतबार र सोमबार लगातार दुई दिन दोहोरो अंकले घटेको बजार परिसूचक नेप्से मंगलबार भने बढेर बन्द भएको छ । मंगलबार नेप्से १०.६६ अंकले वृद्धि हुँदा १८४४.३६ अंकमा बन्द भएको छ । नेप्सेमा वृद्धि भएपनि कारोबार रकम भने केही घटेको छ । सोमबार ८२ करोडको कारोबार भएको बजारमा मंगलबार भने ७७ करोड ४८ लाखको कारोबार भएको छ ।

मंगलबार नेप्सेमा सबै उपसूचकमा वृद्धि हुँदा बजार परिसूचक पनि बढेको हो । होटल तथा पर्यटन उपसूचक सर्वाधिक १.९६ प्रतिशतले वृद्धि हुँदा उत्पादनमुलक उपसूचक १.३६ प्रतिशत र हाइड्रोपावर उपसूचक १.०८ प्रतिशतले वृद्धि भएको छ ।

मंगलबार नेप्सेमा हिमाल दोलखा हाइड्रोपावरको सेयर सर्वाधिक ६ करोड ९६ लाखको कारोबार हुँदा शिवम् सिमेन्टको ४ करोड ४७ लाखको सेयर कारोबार भएको छ । नेप्सेमा मंगलबार कुल २१९ सूचीकृत कम्पनीको सेयर कारोबार भएकोमा १६१ कम्पनीको सेयरमूल्य वृद्धि भएको छ । ५० कम्पनीको सेयरमूल्यमा गिरावट हुँदा ८ कम्पनीको सेयरमूल्य स्थिर छ । मंगलबार कारोबार भएकामध्ये पिपुल्स हाइड्रोपावरको सेयरमूल्य सर्वाधिक ६.३७ प्रतिशतले वृद्धि हुँदा कालिञ्चोक दर्शन लिमिटेडको सेयरमूल्य ४.६५ प्रतिशतले वृद्धि भएको छ । यस्तै सिभिल लघुवित्तको सेयरमूल्य ४.०५ प्रतिशतले वृद्धि भएको छ ।

युनिक नेपाल लघुवित्तको सेयरमूल्य सर्वाधिक ८.६८ प्रतिशतले गिरावट हुँदा सिटजन्स म्युचुअल फण्ड २ को इकाइमूल्य ४.३२ प्रतिशतले गिरावट भएको छ ।