भारतबाटै पक्राउ परे अमृतपाल सिंह

एजेन्सी। भारतको पञ्जाबमा स्वतन्त्र खालिस्तान अभियान चलाइरहेका अमृतपाल सिंहलाई प्रहरीले पक्राउ गरेको छ। ‘वारिस पञ्जाब दे’ संगठनका प्रमुख सिंह पक्राउ परेको पञ्जाब प्रहरीले पुष्टि गरेको छ ।

पञ्जाब प्रहरीले ट्विट गरी सिंह मोगा क्षेत्रबाट पक्राउ परेको जानकारी दिएको हो। उनी पक्राउ परेसँगै प्रहरीले नागरिकलाई शान्ति र सद्भाव कायम राख्न आग्रह गरेको छ।

सिंहले सिख समुदायका लागि खालिस्तान स्वायत्त राज्यको अभियान चलाइरहेका थिए । केही वर्ष दुबईमा बसेर गत वर्ष अगष्टमा पञ्जाब फर्किएका उनले सुरुमा अमृत सञ्चार र नशामुक्त आन्दोलन सुरु गरेका थिए।

केही समययता उनका समर्थकले बेलायत तथा अमेरिकामा समेत प्रदर्शन गर्दै आएका थिए। भारतीय प्रहरी उनको तीव्र खोजीमा रहेको थियो।भारतीय प्रहरीले केही समयअघि नेपाल आएर लुकेको भन्दै नेपाल सरकारसँगसमेत उनको खोजीका लागि सहयोग समेत मागेको थियो।