प्रधानमन्त्रीलाई कारबाही गर्न माग गर्दै निर्वाचन आयोगमा उजुरी

काठमाडौं । प्रधानमन्त्री पुष्पकमल दाहाल प्रचण्डलाई कारबाही गर्न माग गर्दै निर्वाचन आयोगमा उजुरी परेको छ । आसन्न उपचुनावलाई लिएर बहालवाला प्रधानमन्त्रीले निर्वाचन आचारसंहिता उल्लंघन गरेको भन्दै आज तनहुँको मुख्य निर्वाचन अधिकृतको कार्यालयमा उजुरी परेको हो।

राष्ट्रिय स्वतन्त्र पार्टी (रास्वपा) का तनहुँ संयोजक सूर्यमणि पौडेलले प्रधानमन्त्रीले आज पूर्वप्रधानमन्त्रीहरूसहित नेपाली सेनाको हेलिकप्टर प्रयोग गरेर डुम्रेलगायतका क्षेत्रमा गएको भन्दै कारबाही गर्न माग गरेका छन् ।

सम्बोधनका क्रममा उनले गठबन्धनका उम्मेदवारलाई जिताएर पठाएमा नेताहरुलाई मन्त्री, प्रदेशमन्त्री, मुख्यमन्त्री बनाउने आश्वसन दिई आम मतदातालाई अनुचित प्रभाव पारेको पौडेलको ध्यानाकर्षण पत्रमा उल्लेख छ ।