तोसिमा कार्कीले भनिन्- चिकित्सा शिक्षा भर्ना प्रक्रियामा म्याचिङ प्रणालीमा योग्यताक्रम मिचिएको छ, सच्च्याइयोस्

काठमाडौं। राष्ट्रिय स्वतन्त्र पार्टीकी डा. तोसिमा कार्कीले आज संसद्को आकस्मिक समयमा बोल्दै चिकित्सा शिक्षातर्फ भर्ना प्रक्रिया अस्तव्यस्त बनेको भन्दै सरकारको ध्यानाकर्षण गराएकी छन् । कार्कीले अदालतबाट उचित आदेश जारी भएपनि भर्ना प्रक्रिया नसच्याइएको भन्दै आपत्ति जनाएका हुन् ।

कार्कीले भनिन्, ‘स्नातकोत्तर तहको विद्यार्थी भर्ना प्रक्रियामा म्याचिङ प्रणालीमा योग्यताक्रम मिचिएको छ । अदालतबाट उचित आदेश प्राप्त भयो तर,पनि भर्ना प्रक्रिया सच्याइएको छैन । राष्ट्रिय चिकित्सा शिक्षा ऐनको परिच्छेद ६ को दफा १६ र १७,चिकित्सा शिक्षा नियमावलीमा योग्यताक्रम अनुसार भर्नाको स्पष्ट व्यवस्था छ । एकीकृत प्रवेश परीक्षाको मुल मर्म नै जान्नेलाई छान्ने हो ।’

त्रुटिपूर्ण कार्यविधिले कम अंक ल्याउने विद्यार्थीले छात्रवृत्ति पाउने,रोजेको विषय र शिक्षण संस्था पाउने तर,बढी अंक ल्याउने विद्यार्थीले भने छात्रवृत्ति पनि नपाउने र शिक्षण संस्था पनि रोज्न नपाउने अवस्था सिर्जना भएको बताइन् ।

कार्कीले भनिन्,‘नियमावली र ऐनको मर्म मिचिएको छ । त्यसकारण कम्प्युटर बेस्ट प्रणालीमा म्याचिङ गर्नुपर्छ । तसर्थ भर्ना प्रक्रिया सच्याइयोस् ।’