विश्वासको मत नलिई राजीनामा दिने योजनामा गण्डकीका मुख्यमन्त्री खगराज अधिकारी

काठमाडौं। गण्डकीका मुख्यमन्त्री खगराज अधिकारीले विश्वासको मत लिने गरी यही वैशाख ९ गते ३ बजेलाई संसद बैठक बोलाइएको छ । तर, उनले विश्वासको मत नलिई राजीनामा दिने योजनामा रहेको बुझिएको छ ।

मुख्यमन्त्री अधिकारीले आफूले गरेका काम र आफ्ना धारणा राखेर राजीनामा घोषणा गर्ने सम्भावना छ । गत चैत १० गते माओवादी केन्द्रले समर्थन फिर्ता लिएर सरकारबाट बाहिरिएपछि मुख्यमन्त्रीले वैशाख ९ गतेसम्म विश्वासको मत लिनुपर्ने अवस्था छ ।

विश्वासको मत नपाउने भएपछि प्रक्रिया नलम्ब्याउन सचिवालयले सुझाव दिएको छ । ‘नपाउने विश्वासको मत किन लिने भनेर हामीले भनेका छौँ । उहाँले यही गर्छु भन्नुभएको छैन,’ सचिवालय स्रोतले भन्यो ।

एमाले संसदीय दल नेतासमेत रहेका अधिकारीले विश्वासको मत लिने वा राजीनामा दिने भन्नेबारे एमाले संसदीय दलको बैठकमा छलफल गर्दै छन् । वैशाख ३ गते साँझ बस्ने गरी दलको बैठक बोलाइएको एमाले सांसद कृष्णप्रसाद पाठकले जानकारी दिए ।

प्रदेशसभामा नेपाली कांग्रेसका २७, नेकपा एमालेका २२, माओवादीका सभामुखबाहेक ७, राप्रपाका दुई र एक जना स्वतन्त्र निर्वाचित सांसद छन् ।

६० सदस्यीय प्रदेशसभामा मुख्यमन्त्रीले बहुमत अर्थात् ३१ सांसद आफ्नो पक्षमा पार्न सक्ने अवस्था छैन ।

खगराज गत मंसिरको चुनावपछि पुस २५ गते मुख्यमन्त्री नियुक्त भएका थिए । उनलाई त्यतिबेला एमाले, माओवादी, राप्रपा र एक जना स्वतन्त्र सांसदले समर्थन गरेका थिए । पछि स्वतन्त्र सांसद राजीव गुरूङले विश्वासको मत नदिई प्रतिपक्षमा बसे ।

समर्थन गरेको दलले समर्थन फिर्ता लिएमा ३० दिनभित्र विश्वासको मत लिनुपर्ने संवैधानिक व्यवस्था छ ।