उत्ताउलो नहुन पार्टी कार्यकर्तालाई ओलीको निर्देशन

काठमाडौं । नेकपा एमाले अध्यक्ष केपी शर्मा ओलीले पार्टीका नेता कार्यकर्ताहरूलाई उत्ताउलो नहुन निर्देशन दिएका छन् । मिसन ग्रासरुट अभियानको क्रममा सोमबार गुल्मी सदरमुकाम तम्घासमा आयोजित कार्यक्रमलाई सम्बोधन गर्दै अध्यक्ष ओलीले नेता कार्यकर्तालाई यस्तो निर्देशन दिएका हुन् ।

एमालेमा रहने हरेक नेता-कार्यकर्ताले आचरणमा सुधार गर्नुपर्ने बताउँदै उनले भने, ‘यो गंगा जस्तै हो, अन्त खहरेमा रहेका यहाँ आएपछि यहाँ सुध्रनुपर्दछ । पार्टी संगठनको जिम्मेवारीमा पूर्ण बफादार भएर लागौं ।’

एमाले पार्टी इमानका लागि इमानका साथ लडेको पार्टी भएको भन्दै एमाले कार्यकर्ताबाट बेइमानी गर्ने कुरा कल्पनासमेत गर्न नसकिने उनको भनाइ छ । अध्यक्ष ओलीले आफ्नो पार्टीले विकास, समृद्धि र राष्ट्रिय स्वाधीनताको मुद्दालाई बलियो गरी उठाएकाले देशको अस्थिरतामा रमाइरहेका देशी(विदेशी प्रतिक्रियावादीहरुले घेराबन्दी गरेको आरोप लगाए ।