परराष्ट्रमन्त्रीमा आरजु राणा र शेखर कोइरालाको दाबी, अर्थमा गगन कि प्रकाशशरण ?

काठमाडौं । सत्तारुढ दलमध्येको मुख्य घटक एमाले सत्ताबाट बाहिरिसकेको छ । एमालेको सत्ता बहिर्गमनपछि अब नेपाली कांग्रेस पुष्पकमल दाहाल ‘प्रचण्ड’ नेतृत्वको सरकारमा सहभागी हुने भएको छ । फागुन २५ मा हुने राष्ट्रपति निर्वाचनको आचारसंहिता लागू भएकाले मन्त्रिमण्डल बिस्तार फागुन २६ पछि मात्र हुनेछ ।

नेपाली कांग्रेसले गृहमन्त्रालय प्रधानमन्त्रीकै पार्टीलाई छाड्ने संभावना छ । गृह माओवादीकै भागमा पर्ने निश्चित भए पनि मोहनबहादुर बस्नेतहरुले गृहमन्त्री भन्दै प्रचार अभियान पनि चलाएका छन् ।

यसपटक अर्थ, परराष्ट्र, भौतिक पूर्वाधार मन्त्रालय नेपाली कांग्रेसले लिने संभावना छ । उपसभापति पूर्णबहादुर खड्काले मन्त्री नहुने घोषणा गरिसकेकाले नेपाली कांग्रेसबाट सरकारको नेतृत्वमा को जाने भन्ने कौतहुलता सर्बत्र छ । अर्थमन्त्री हुन यसअघि नै दौरासुरुवाल सिलाइसकेका डा. प्रकाशशरण महत लागिरहेका छन् । तर उनको नेतृत्वमा सरकारमा पठाउँदा स्वीकार्य नहुने संभावना भएकाले अर्थमन्त्रीसहित उपप्रधानमन्त्रीमा पार्टी महामन्त्री गगनकुमार थापाको चर्चा पनि एक कोणबाट चलाइएको छ ।

एमालेसँगको गठबन्धन तोड्न र अहिलेको गठबन्धन जोड्न थापासमेतलाई सभापति शेरबहादुर देउवाले परिचालन गरेका थिए । थापाले कांग्रेसको भागमा राष्ट्रपति पार्नका लागि सक्रियता देखाएकाले सभापति देउवाले उनलाई नै सरकारको नेतृत्व गर्न आग्रह गरेको पनि चर्चा छ ।

महतलाई नै अर्थमन्त्री बनाउने र उनी स्वीकार्य नभए ज्ञानेन्द्रबहादुर कार्कीलाई बनाउन आरजु राणाले भने सभापति देउवालाई दबाब दिइरहेको स्रोत बताउँछ । कार्की कांग्रेस सरकारमा हुँदा प्रायः हरेक पटक मन्त्री हुनेमा पर्दछन् । एउटै ब्यक्तिलाई पटक पटक मन्त्रीमा पठाएको बिषयमा पार्टीभित्रै उनको बिरोध हुँदैआएको छ । यसपटक पनि मन्त्री बनाएमा बिरोधको स्वर झन् बढी गुन्जने डर देउवालाई छ ।

नेपाली कांग्रेसले परराष्ट्र मन्त्रालय भने नछाड्ने भएको छ । परराष्ट्र मन्त्रीमा डा. आरजु देउवाले धेरै नै रहर गरेकी छन् । सभापति देउवा पनि श्रीमती राणालाई परराष्ट्र मन्त्री बनाउन सकारात्मक भइसकेका छन् । यद्यपि परराष्ट्रमन्त्री पाए डा. शेखर कोइराला पनि सरकारमा जाने पक्षमा रहेको बताइन्छ ।