सिसडोल अवलोकन गर्दै बालेनले भने– केमिकल हालेर एक हप्तामा दुर्गन्ध हटाइन्छ

काठमाडौं ।काठमाडौं उपत्यकाको फोहोर विसर्जन गर्ने स्थान सिसडोल अवलोकन गर्दै काठमाडौं महानगरपालिकाका मेयर बालेन्द्र साह (बालेन)ले तत्कालको लागि केमिकल राखेर गन्ध हटाउने आश्वासन दिएका छन् ।

स्थानीयको गुनासा सुनेपछि मेयर साहले तत्कालको लागि केमिकल राखेर गन्ध हटाउने उपाय अपनाउने आश्वासन दिएका हुन्  ।

केमिकल हालिसकेपछि गन्ध हराउन एक हप्ता लाग्ने बताउँदै उनले भने, ‘एक हप्तामा गन्ध नआउने बनाउन सकिन्छ । हाल्नलाई यहाँ केमिकल आउनुपर्‍यो है फेरि । केमिकल आउन ट्रक रोक्न भएन है ।’

फोहोरबाट मल बनाउने सिस्टम राख्ने र ड्रिल गरेर ग्यास निकाल्ने योजना सुनाउँदै उनले यी सबै काम गर्न तीन–चार महिना लाग्नसक्ने बताए ।

उनले सड्ने र नसड्ने फोहोर छुट्टयाएर विसर्जन गर्ने व्यवस्था मिलाउने र त्यसका लागि जनचेतना जगाउने काम गर्ने पनि बताए ।