एमालेले महाधिवेशन उद्घाटन समारोह अवधिभर पूर्व-पश्चिम राजमार्ग बन्द गर्ने

काठमाडौं । चितवन जिल्ला प्रशासनले भिड व्यवस्थापनका लागि भन्दै एमालेको १० औं महाधिवेशनको उदघाटन समारोह अवधिभर सवारी साधनहरुलाई नारायणगढ बजार क्षेत्रभित्र प्रवेशमा रोक लगाउने भएको छ ।

नेकपा एमालेले महाधिवेशन उदघाटन समारोहमा १० लाख मानिस उतार्ने घोषणा गरेपछि जिल्ला प्रशासनले भिड व्यवस्थापन र सुरक्षाका लागि भन्दै मुख्य बजार क्षेत्रभित्र अत्यावश्यक सेवाबाहेकका सार्वजनिक तथा निजी गाडीहरुलाई प्रवेशमा रोक लगाउने निर्णय गरेको स्राेतले जानकारी दिएकाे छ । 

नेकपा एमालेको १० औं राष्ट्रिय महाधिवेशनको उदघाट समारोह यही मंसिर १० गते नारायणगढको नारायणी नदी किनारमा आयोजना हुँदै छ । 

जिल्ला प्रशासनले मंसिर १० गते बिहान १० बजेदेखि पश्चिम नेपालबाट आउने गाडीहरुलाई पूर्वी नवलपरासीको गैंडाकोट क्षेत्रमा र पूर्वबाट आउने गाडीहरुलाई भरतपुरको केन्द्रीय बस टर्मिनल क्षेत्रमा रोकिने जानकारी दिए भने काठमाडौं वा पोखराबाट मुग्लिन हुँदै यात्रा गर्ने गाडीहरुलाई आँपटारी र पूर्वबाट आउने गाडीहरुलाई जिल्ला प्रशासन कार्यालय चोकदेखि भित्र प्रवेश गर्न नदिइने भएकाे छ ।