काठमाडौँ । अख्तियार दुरुपयोग अनुसन्धान आयोगले सेवाग्राहीबाट घुस लिएको आरोपमा बुढानीलकण्ठ नगरपालिकाबाट एक जनालाई पक्राउ गरेको छ ।
पक्राउ पर्नेमा काठमाडौँस्थित बुढानीलकण्ठ नगरपालिकाका प्राबिधिक विनोद कुमार पौडेल रहेका छन् ।
आयोगका अनुसार सडक निर्माण कार्यको ठेक्का सम्झौता बमोजिम कार्य सम्पन्नपछि भुक्तानी दिने क्रममा सेवाग्राहीसँग ७२ हजार घुस माग गरिरहेको सूचनाका आधारमा खटिएको टोलीले पौडेललाई पक्राउ गरेको हो ।
पौडललाई सेवाग्राहीसँग ७२ हजार घुस लिइसकेको अवस्थामा बुढानीलकण्ठ नगरपालिका वडा नं. ६ स्थित सव्रिना होटलबाट शुक्रबार नियन्त्रणमा लिइएको आयोगका प्रवक्ता नारायण प्रसाद रिसालले जानकारी दिए ।
पक्राउ परेका पौडेलमाथि थप अनुसन्धान भइरहेको अख्तियारले जनाएको छ ।
