बालुवाटारमा सत्तारूढ गठबन्धनको बैठक, मन्त्रिपरिषदलाई पूर्णता दिने अन्तिम तयारी

काठमाडौँ । प्रधानमन्त्री शेरबहादुर देउवाले सत्तारूढ गठबन्धनको बैठक आज पनि बोलाएका छन् । 

देउवाको सचिवालयका अनुसार आज बिहान ८:३० बजे गठबन्धनका शीर्ष नेताहरुबीच बालुवाटारमा छलफल गर्ने कार्यक्रम तय भएको छ।

यसअघि बुधबार पनि गठबन्धनका नेताहरुबीच छलफल भएको थियो । जसमा मन्त्रिपरिषदलाई छिट्टै पूर्णता दिने, मन्त्रीको जिम्मा पार्टीका शीर्ष नेताहरुलाई नै दिने र गठबन्धनबाट सरकारका न्युनतम साझा कार्यक्रम ल्याउनेजस्ता विषयमा छलफल भएको थियो।

यस्तै, स्रोतका अनुसार आजको बैठकमा पनि मन्त्रिपरिषदलाई पूर्णता दिने तयारी अनुसार प्रधानमन्त्री देउवाले बैठक बोलाएका हुन् । कुन पार्टीले कति र कुन-कुन मन्त्रालय तथा को मन्त्री भन्नेबारे छलफल हुने स्रोतको दाबी छ। 

हाल कांग्रेस सभापति देउवा नेतृत्वको सरकारमा चार मन्त्री र एक राज्यमन्त्रीमात्रै रहेका छन्। गठबन्धनमा छलफलपछि मन्त्रिपरिषदलाई पूर्णता एक/दुई दिनमै दिने तयारी छ।

सत्ता गठबन्धनमा कांग्रेस, नेकपा माओवादी केन्द्र, नेकपा एमालेको माधवकुमार नेपाल पक्ष, जनता समाजवादी पार्टी र राष्ट्रिय जनमोर्चा छ।