काठमाडौं । राष्ट्रिय परीक्षा बोर्डले भौतिक उपस्थितिमा कक्षा १२ को परीक्षा गराउने तयारी गरेको छ ।
कोभिड–१९ संकट व्यवस्थापन केन्द्र (सीसीएमसी) ले परीक्षा सञ्चालन गर्न अनुमति दिने भएपछि बोर्डले भौतिक उपस्थितिमा यही साउनको चौथो हप्तामा कक्षा १२ को परीक्षा गराउने तयारी गरेको हो ।
सीसीएमसीले परीक्षा सञ्चालन गर्न अनुमति दिएको पत्र आएपछि औपचारिक रुपमा साउनको चौथो हप्ता परीक्षा गर्ने गरी परीक्षा केन्द्र, मिति तोक्ने र तालिका सार्वजनिक गर्ने तयारी बोर्डले थालेको छ ।
करीब तीन लाख ८६ हजार विद्यार्थी कक्षा १२ को परीक्षाका लागि प्रतिक्षारत छन् । यसअघि गत जेठ २६ गते कक्षा १२ को परीक्षा गर्ने कार्यतालिका सार्वजनिक गरिएको थियो ।
तर, कोरोना संक्रमण नियन्त्रण तथा रोकथामका लागि निषेधाज्ञा जारी गरिएपछि स्थगित गरिएको थियो ।
