गण्डकी प्रदेश : परिवर्तित सन्दर्भका बारेमा छलफल गर्दै तीन दल

काठमाडौं । बिहीबार मुख्यमन्त्री पृथ्वी सुब्बा गुरुङको सिफारिसमा प्रदेशसभा अधिवेशन अन्त्य गरेपछि विपक्षीदलहरु परिवर्तित सन्दर्भका बारेमा छलफल गर्न जुटेका हुन् । 

स्रोतका अनुसार परिवर्तित सन्दर्भका बारेमा छलफल गर्न काँग्रेस, माओवादी केन्द्र र जसपा नेपालका सांसदहरुबीच छलफल भइरहेको छ । 

उक्त छलफल बैठक बोलाउन प्रदेश प्रमुख समक्ष लिखित माग गर्ने सन्दर्भ रहेको स्रोतले बताएको छ ।

संविधानको धारा १८३ को उपधारा ३ मा प्रदेश प्रमुखले प्रदेशसभाको अधिवेशन चालू नरहेको वा बैठक स्थगित भएको अवस्थामा अधिवेशन वा बैठक बोलाउन वाञ्छनीय छ भनी प्रदेशसभाको सम्पूर्ण सदस्य संख्याको एक चौथाइ सदस्यहरुले लिखित अनुरोध गरेमा त्यस्तो अधिवेशन वा बैठक बस्ने मिति र समय तोक्ने व्यवस्था छ । त्यसरी तोकिएको मिति र समयमा प्रदेशसभाको अधिवेशन प्रारम्भ हुने वा बैठक बस्ने सो उपधारामा उल्लेख छ ।

सोही अनुसार प्रदेश प्रमुख समक्ष प्रदेशसभा बैठकको माग गर्दै लिखित निवेदन दिनेबारे दलहरुबीच छलफल भइरहेको हो ।

काँग्रेस, माओवादी केन्द्र, जसपा नेपाल र राष्ट्रिय जनमोर्चा मिलेर बिहीबार नै प्रदेश मुख्यमन्त्री पृथ्वी सुब्बा गुरुङविरुद्ध अविश्वास प्रस्ताव दर्ताको तयारी गरेका थिए । अविश्वास प्रस्ताव दर्ता गर्ने तयारी हुनासाथ मुख्यमन्त्री गुरुङले प्रदेश सभा अधिवेशन अन्त्यका लागि प्रदेश प्रमुख समक्ष सिफारिस गरेका थिए ।