चोलेन्द्रलाई नियन्त्रणमा लिएको घटनामा रञ्जुको टिप्पणीः पक्राउ गर्दा सुर र ताल मिल्नुपर्छ

काठमाडौँ । राष्ट्रिय स्वतन्त्र पार्टी (रास्वपा)की सांसद रञ्जु दर्शनाले कानुनको शासनमा अधिकारको प्रयोग विधि र प्रमाणका आधारमा मात्र हुनुपर्नेमा जोड दिएकी छन् ।

पूर्वप्रधानन्यायाधीशलाई सुरक्षित स्थानमा स्थानान्तरण गर्ने नाममा गरिएको पक्राउप्रति उनको असन्तोष छ ।

सामाजिक सञ्जालमा टिप्पणी गर्दै सांसद दर्शनाले आफ्नो असन्तुष्टि व्यक्त गरेकी हुन् । आरोप मात्रै पक्राउको पर्याप्त आधार हुन नसक्ने उनले उल्लेख गरेकी छन् ।

‘कसुर देखिए पक्राउ गर्न पाइन्छ भनेर कानुनमै व्यवस्था छ । तर पक्राउ गर्दा पनि सुर र ताल मिल्नैपर्छ,’ उनले भनेकी छन्, ‘कसुर अदृश्य भए पनि कानुनले प्रमाण माग्छ । आरोप मात्र पर्याप्त हुँदैन, कसुर पुष्टि गर्ने आधार र प्रमाण पनि चाहिन्छ ।’

सांसद दर्शनाले कानुनी शासनको मर्म नै विधि र प्रमाणमा आधारित हुने स्पष्ट पार्दै बिनाप्रमाण अधिकार प्रयोग गर्न नमिल्ने तर्क गरेकी छन् । उनले पूर्वप्रधानन्यायाधीशको सुरक्षा संवेदनशीलताप्रति चासो व्यक्त गर्दै सुरक्षा सतर्कता बढाउन माग गरेकी छन् ।

‘उनको सुरक्षाका लागि सतर्कता बढाइयोस्, ‘एक्स वाइ जेड’ कुनै जेनेरेशनले थ्रेट दिन नसकुन्,’ दर्शनाले लेखेकी छन् ।