रवि लामिछाने रास्वपाको सभापतिमा दोहोरिने, भूपदेव शाह चर्चामा मात्र सीमित

काठमाडौं । राष्ट्रिय स्वतन्त्र पार्टी (रास्वपा)को सभापतिमा रवि लामिछाने नै दोहोरिने निश्चित जस्तै देखिएको छ । आगामी ७ देखि ९ असारसम्म चितवनमा हुने पहिलो महाधिवेशनबाट पनि वर्तमान सभापति रवि लामिछानेलाई नै निरन्तरता दिने तयारी रास्वपाभित्र भइरहेको छ ।

रास्वपाभित्रका नेताहरूले सार्वजनिक रूपमा नै लामिछानेको विकल्प तत्काल नदेखिएको टिप्पणी गरिरहेका छन् । प्रधानमन्त्रीसमेत रहेका बरिष्ठ नेता वालेन्द्र शाह समूहले हालै मनोनीत भएका महामन्त्री भूपदेव साहलाई अध्यक्षको रुपमा चर्चामा ल्याएका छन् । तर, उनी चर्चामै सीमित हुने देखिएको छ ।

चार वर्षअघि स्थापना भएको रास्वपाले यो महाधिवेशनलाई आफ्नो संस्थागत संरचना औपचारिक रूपमा सुदृढ गर्ने अवसरका रूपमा लिएको छ ।

पार्टीले छोटो समयमै उल्लेखनीय राजनीतिक उपस्थिति बनाएको दाबी गर्दै नेताहरूले आगामी नेतृत्व पनि स्थायित्वकै दिशामा जाने संकेत गरेका छन् ।
महाधिवेशनको तयारीबारे बोल्दै महामन्त्री कविन्द्र बुर्लाकोटीले पार्टी नेतृत्वमा ठूलो परिवर्तनको सम्भावना नरहेको स्पष्ट संकेत गरेका छन्। उनले नेतृत्व र सरकारबीचको ‘सन्तुलन’ कायम गर्दै पार्टी अघि बढ्ने बताए ।

त्यसैगरी, संसदीय दलका उपनेता गणेश पराजुलीले पनि पार्टी एकताबद्ध रहेको दाबी गर्दै सभापति लामिछानेकै नेतृत्वमा महाधिवेशन अगाडि बढ्ने बताएका छन् ।
उनका अनुसार, महाधिवेशनले सबै निर्णय लोकतान्त्रिक प्रक्रियामार्फत टुंग्याउनेछ, तर तत्काल नेतृत्व परिवर्तनको एजेन्डा नरहेको स्पष्ट छ ।

रास्वपाका नेताहरूका अनुसार वरिष्ठ नेता बालेन्द्र शाहले पनि पार्टी नेतृत्व लामिछानेकै हातमा रहने संकेत गरेका छन र महाधिवेशनपछिको औपचारिक कार्यक्रमहरूमा सहभागी हुने तयारीमा छन् ।

रास्वपाले अहिले वडा र पालिका तहका अधिवेशनलाई तीव्रताका साथ अगाडि बढाएको छ ।