हर्क साम्पाङ भन्छन्–गरिबलाई सडकमा पुर्‍याउने प्रधानमन्त्री वालेन्द्र शाहले तुरुन्त राजीनामा दिनुपर्छ

काठमाडौं । श्रम संस्कृति पार्टीका अध्यक्ष एवं सांसद हर्क साम्पाङले प्रधानमन्त्री वालेन्द्र शाहको कडा आलोचना गर्दै नैतिकताको आधारमा तत्काल राजीनामा दिन माग गरेका छन् ।

साम्पाङले सामाजिक सञ्जाल फेसबुकमा सरकारको कदमप्रति असन्तुष्टि जनाउँदै ‘गरिबलाई सडकमा पुर्‍याउने सरकारको औचित्य समाप्त भइसकेको’ बताएका छन् ।
उनले लेखेका छन्–‘बालेनले तुरुन्तै राजीनामा दिएर मार्ग प्रशस्त बनाइदिनु राम्रो। गरिबलाई सडकमा पुर्‍याउने सरकारको औचित्य सकियो ।’

साम्पाङले पछिल्ला कदमलाई ‘राज्य आतंक’को संज्ञा दिँदै त्यसले सर्वसाधारणलाई बेघर र बासविहीन बनाएको आरोप लगाए । यस्तो परिस्थितिमा प्रधानमन्त्रीले नैतिक जिम्मेवारी वहन गर्दै पद छाड्नुपर्ने उनको भनाइ छ ।

‘राज्य आतंक मच्चाएर जनतालाई बेघर, बासविहीन बनाएर बिजोग बनाइएको छ, त्यसैले नैतिकताको आधारमा राजीनामा दिनुपर्छ’ उनले उल्लेख गरेका छन् । साथै, आफूले पहिले दिएको सुझाव नमान्दा वर्तमान अवस्था आएको दाबीसमेत गरेका छन् ।