सर्लाहीका गोरखकाली र त्रिभुवननगर नाकाबाट तस्करी बढ्दो, नेपाल प्रहरी र सशस्त्र प्रहरीकै सेटिङको आरोप

सर्लाही । सर्लाहीको सीमावर्ती क्षेत्र अन्तर्गत प्रहरी चौकी गोरखकाली र त्रिभुवननगर क्षेत्र पछिल्लो समय तस्करीका लागि सहज मार्ग बनेको आरोप सार्वजनिक भएको छ । स्थानीय स्रोतका अनुसार यी नाकाबाट रातिको समयमा विभिन्न सामान अवैध रूपमा नेपाल–भारत ओसारपसार भइरहेको दाबी गरिएको हो ।

स्थानीयले नेपाल प्रहरी र सशस्त्र प्रहरी दुबैको मिलेमतो तथा संरक्षणमै तस्करी धन्दा सञ्चालन भइरहेको आरोप लगाएका छन् । सीमाक्षेत्रमा खटिएका सुरक्षाकर्मीको सेटिङ बिना यति ठूलो मात्रामा अवैध कारोबार सम्भव नभएको उनीहरूको भनाइ छ ।

प्रहरी चौकी गोरखकाली क्षेत्र अन्तर्गत पर्ने मलङ्वा ट्रायल सेन्टरको पूर्वी नाका हुँदै मोटरसाइकलमार्फत कपडा लगायतका सामान तस्करी भइरहेको आरोप छ । स्थानीय स्रोतले उपलब्ध गराएको भिडियोमा रातिको समयमा मोटरसाइकल प्रयोग गरी सामान ओसारपसार भइरहेको देखिएको छ ।

त्यस्तै त्रिभुवननगर क्षेत्रमा पनि पछिल्लो समय तस्करी गतिविधि बढेको स्रोतले जनाएको छ । त्रिभुवननगरको पश्चिमी नहर साइडस्थित चोरबाटो प्रयोग गरी नेपालबाट भारततर्फ तथा भारतबाट नेपालतर्फ विभिन्न सामान ल्याउने–लैजाने काम भइरहेको बताइएको छ ।

स्थानीय स्रोतका अनुसार प्रहरी चौकी गोरखकालीका इन्चार्ज वरिष्ठ सई यज्ञ शाह तथा त्रिभुवननगरका इन्चार्ज वरिष्ठ सई प्रमाणन्द यादवकै मिलेमतोमा तस्करी धन्दा सञ्चालन भइरहेको आरोप लगाइएको छ । साथै सीमामा खटिएका सशस्त्र प्रहरीका केही सदस्यको समेत संरक्षणमा तस्करी भइरहेको दाबी गरिएको छ ।

यसैबीच, जिल्ला प्रहरी कार्यालय सर्लाहीका एसपी योगेन्द्र बहादुर खड्काका घुमुवा सहायक हवल्दार धर्मेन्द्र पटेलमाथि पनि तस्करहरूसँग मिलेर रकम असुली गर्ने आरोप लागेको छ । नाम नखोल्ने सर्तमा एक व्यापारीले धर्मेन्द्र पटेलले तस्करहरूसँग डिल गरेर एसपीकै नाममा पैसा उठाउने गरेको दाबी गरेका छन् ।

यसअघि केही दिनअघि सर्लाहीका अन्य सीमा नाका प्रयोग गरी भारततर्फ तस्करी गरिएको ठूलो परिमाणको चिनियाँ लसुन र काँक्रोको बीउ भारतीय सशस्त्र सीमा बल (एसएसबी) ले सीतामढी जिल्लाको लालबन्दी नाकामा बरामद गरेको घटना सार्वजनिक भएको थियो । उक्त घटनामा दुई वटा महिन्द्रा बोलेरो पिकअपसहित दुई जना व्यक्ति नियन्त्रणमा परेका थिए ।

त्यस घटनाले सर्लाहीका सीमा नाका हुँदै हुने तस्करी अझै सक्रिय रहेको संकेत गरेको थियो । त्यसबेला पनि जिल्लामा तस्करी नियन्त्रणमा कडाइ गरिएको दाबी भइरहेका बेला प्रहरीकै मिलेमतोमा अवैध कारोबार भइरहेको आरोप उठेको थियो ।

सरकारले एक सय रुपैयाँभन्दा बढी मूल्यका सामान ल्याउँदा अनिवार्य रूपमा भन्सार प्रक्रिया पूरा गर्नुपर्ने व्यवस्था गरे पनि सीमाक्षेत्रमा तस्करी रोकिएको नदेखिएको स्थानीयको गुनासो छ । सामान्य नागरिकमाथि कडाइ हुने तर तस्करहरू भने निर्बाध रूपमा सक्रिय रहने गरेको आरोपसमेत उठेको छ ।

पछिल्ला घटनाक्रम र निरन्तर उठिरहेका आरोपहरूले सर्लाही जिल्लाको सीमा सुरक्षा, नेपाल प्रहरी र सशस्त्र प्रहरीको निगरानी तथा तस्करी नियन्त्रणको प्रभावकारितामाथि गम्भीर प्रश्न उठाएको छ । यस विषयमा सम्बन्धित निकायले निष्पक्ष छानबिन गरी वास्तविकता सार्वजनिक गर्नुपर्ने माग स्थानीयले गरेका छन् ।