अजय सुमार्गी पनि सम्पत्ति शुद्धीकरणको अनुसन्धानमा तानिंदै !

काठमाडौं । सम्पत्ति शुद्धीकरण अनुसन्धान बिभागले ब्यवसायी दीपक भट्टको छानबिन गरी मुद्दा दायर गर्ने तयारी गरेपछि नेपाल प्रहरीको केन्द्रीय अनुसन्धान ब्यूरो(सीआईबी)ले उनलाई नियन्त्रणमा लिइसकेको छ । भट्ट लगत्तै सम्पत्ति शुद्धीकरणको पत्र अर्का ब्यवसायी अजयराज सुमार्गीलाई समेत थमाइएको विश्वस्त स्रोत बताउँछ ।

अजयराज पराजुली सुमार्गीको महालक्ष्मी विकास बैंक, महालक्ष्मी फाइनान्स मिडिया र घरजग्गा ब्यवसायमा पनि लगानी छ । सिद्धार्थ फाइनान्स लिमिटेड, महालक्ष्मी फाइनान्स र मालिका विकास बैंकबीच मर्जर भएर महालक्ष्मी विकास बैंक स्थापना भएको थियो । २०७४ मा महालक्ष्मी विकास बैंक र पूर्वप्रधानमन्त्री शेरबहादुर देउवाका साला भूषण राणाको यति डेभलपमेन्ट बैंक मर्ज भएका थिए ।

सुमार्गीले २०७६ सालमा बिशालनगरमा रहेको करिब ८ रोपनी जग्गा नेपाल बंगलादेश बैंकलाई करिव ९५ करोड रुपैयाँमा बिक्री गरेका थिए । बंगलादेश बैंकले २०७७ चैतको अन्तिम साता केन्द्रीय कार्यालय प्रयोजनको लागि भन्दै विवादास्पद व्यापारी अजयराज सुमार्गीको मुक्तीश्री प्रालिको नाममा रहेको विशालनगरस्थित उक्त जग्गा खरिद गरेको थियो । बजारमूल्य अनुसार प्रतिआना ५५ देखि ६० लाख पर्ने उक्त जग्गालाई ७८ लाख आनामा खरिद गरिएका कारण २४ करोड भन्दा बढी अनियमितता भएको भन्दै राष्ट्रबैंकमा उजुरी परेको थियो ।

सुमार्गीले प्रतिआना ६० लाखमा उक्त जग्गा दिए पनि ७८ लाखमा कारोबार भएको देखाउँदा करोडौं कमिसनको खेल भएको प्रष्ट देखिएको भन्दै बैंकका एक संचालकले बोर्डमै कुरा उठाएका थिए । सुमार्गीले फ्रान्सका राजदूतको निजी निवास रहेको घरसहितको १९ रोपनी १२ आना जग्गा २०७१ सालमा ६३ करोड रुपैयाँमा खरिद गरेका थिए । ४ वर्षपछि २०७६ मा ४ गुणा बढी मूल्य लिएर प्रतिआना ७८ लाख रुपैयाँका दरले बिक्री गरेका थिए ।

बजारमूल्य अनुसार प्रति आना ६० लाख पर्ने उक्त जग्गालाई प्रति आना ७८ लाख ४० हजार रुपैयाँ खरिद गरेर झण्डै २२ करोड रुपैया घोटला गरिएको भन्दै बैंककै सञ्चालकहरुले राष्ट्र बैंक र अख्तियार दुरुपयोग अनुसन्धान आयोगमा सञ्चालक समितिका अध्यक्ष र बैंकका प्रमुख कार्यकारी अधिकृत(सिइओ) विरुद्ध उजुरी हालेका थिए । अध्यक्ष बंगलादेशी नागरिक जलाल अहमद र तत्कालीन सिइओ ज्ञानेन्द्रप्रसाद ढुंगानाले जग्गा खरिदका लागि सञ्चालक समितिबाट निर्णय गराउन खोज्दा केही सञ्चालकहरुले नोट अफ डिसेन्ट लेखी विरोध गरेका थिए ।