स्थानीय तहका जनप्रतिनिधि असुरक्षित, रास्वपाका नाममा वडाध्यक्षदेखि पालिका प्रमुखलाई धम्की

काठमाडौं । वालेन्द्र शाह नेतृत्त्वको सरकार गठनपछि स्थानीय तहमा राष्ट्रिय स्वतन्त्र पार्टी(रास्वपा)का नेता–कार्यकर्ताले स्थानीय तहका जनप्रतिनिधिलाई दबाब दिने, धम्क्याउने र तर्साउन थालेका छन् । जसका कारण जनप्रतिनिधिहरु असुरक्षित महसुस गर्न थालेका छन् ।

बाराको जीतपुर–सिमरा उपमहानगरपालिकाका मेयर राजन पौडेलले रास्वपाको नाममा वडाध्यक्षहरुलाई धम्की दिने, कानुनबिपरीतका काम गर्न दबाब दिने गर्दा वडाध्यक्षहरु असुरक्षित महसुस गर्न थालेको खुलासा गरेका छन् ।

मेयर पौडेलले सामाजिक संजालमै वडाध्यक्षहरुले असुरक्षित महसुस गरेको डरलाग्दो खुलासा गरेका छन् । उनले वडाध्यक्षहरुलाई वडामा बसेर सुरक्षित साथ काम गर्ने वातावरण बनाउन प्रधानमन्त्री वालेन्द्र शाहसमक्ष माग गरेका छन् ।

बाराको जीतपुर–सिमरा उपमहानगरपालिका एक प्रतिनिधि उदाहरण हो, रास्वपाको सरकार गठनपछि सबै पालिकाका वडाध्यक्षदेखि अध्यक्ष र मेयरलाई धम्की दिने क्रम बढेको छ ।

मेयर पौडेलले बिहीबारको नगर कार्यपालिका बैठकपछि सामाजिक संजाल फेसबुकमा लेखेका छन्–‘आजको कार्यपालिकाको बैठकमा केही वडाध्यक्षज्युहरुले वडामा बसेर काम गर्न अप्ठ्यारो भएको र असुरक्षित महसुस भएको जानकारी गराउनुभएको छ । वडामा बसेर काम गर्ने जनप्रतिनिधिहरुलाई सुरक्षित महसुस गर्ने वातावरण बनाइदिनु हुन बालेन सरकारसँग अनुरोध गर्दछु ।’