कांग्रेसमा देउवा पक्षले छुट्टै भेला बोलाउने तयारी थाल्यो

काठमाडौं । नेपाली कांग्रेसभित्र फेरि अन्तरकलह सुरु भएको छ । विशेष महाधिवेशनलगत्तै सम्पन्न प्रतिनिधिसभा निर्वाचनको परिणामसँगै नेपाली कांग्रेसभित्रको आन्तरिक कलह पुनः सतहमा देखिन थालेको हो ।

कांग्रस सभापति गगन थापा र उपसभापति विश्वप्रकाश शर्मा पक्षले निर्वाचन समीक्षाका लागि केन्द्रीय समिति बैठक जारी राखेकै बेला निवर्तमान सभापति शेरबहादुर देउवा पक्षले छुट्टै समानान्तर केन्द्रीय समितिको बैठक बोलाउन लागेको छ ।

देउवा पक्षले ‘पुरानै’ केन्द्रीय समितिको छुट्टै बैठक बोलाउने तयारी गरेपछि विवादले नयाँ मोड लिएको हो । निर्वाचनमा कांग्रेसले अनपेक्षित पराजय भोगेपछि देउवा पक्ष वर्तमान नेतृत्वसँग असन्तुष्ट देखिएको छ ।

निवर्तमान कार्यवाहक सभापति पूर्णबहादुर खड्का निवर्तमान केन्द्रीय सदस्यहरूको छुट्टै भेला बोलाउने गृहकार्यमा जुटेका छन् ।

बैठकमा उपसभापति विश्वप्रकाश शर्माले सभापति गगन थापाको राजीनामा अस्वीकृत गर्ने प्रस्ताव ल्याएपछि देउवा पक्ष थप आक्रोशित बनेको बताइएको छ । उनीहरूले यसलाई ‘राजनीतिक स्टन्ट’ र ‘चटके कार्य’ को संज्ञा दिएका छन् । सभापतिले राजीनामा सार्वजनिक नगरी सिधै अस्वीकृतिको प्रस्ताव ल्याउनु नाटकमात्र भएको इतर पक्षको तर्क छ । यद्यपि, संस्थापन पक्षले भने नैतिक जिम्मेवारी लिएर एकताको सन्देश दिन खोजिएको दाबी गरेको छ ।

कांग्रेस यसपटकको निर्वाचनमा प्रत्यक्षतर्फ १८ र समानुपातिकतर्फ २० गरी जम्मा ३८ सिटमा खुम्चिएको छ । स्वयं सभापति गगनकुमार थापा नै पराजीत भएका छन् । अघिल्लो निर्वाचनमा ८८ सिटसहित पहिलो दल बनेको कांग्रेस यसपटक दोस्रो स्थानमा पुगेको हो ।