एमालेले टुंग्यायो समानुपातिक उम्मेदवार, को को परे ?

काठमाडौं । नेकपा(एमाले)ले प्रतिनिधिसभाका समानुपातिक उम्मेदवारको टुंगो लगाएको छ ।

शनिबार दिउँसो गुण्डुमा बसेको एमालेको सचिवालय बैठकले समानुपातिक उम्मेदवारको टुंगो लगाएको हो । निर्वाचन आयोगले बिहीबार राजनीतिक दलहरुलाई ३ दिनभित्र समानुपातिक उम्मेदवार पठाउनका लागि निर्देशन दिएको थियो ।

पार्टी अध्यक्ष केपी ओलीको निवास गुण्डुमा बसेको एमालेको सचिवालय बैठकले समावेशी सिद्धान्तअनुसार बिभिन्न समूहबाट सांसद चयन गरेको जनाएको छ ।

एमालेले जनजाति महिलाबाट भूमिका सुब्बा र गंगादेवी श्रेष्ठलाई समानुपातिकतर्फको सांसदमा पठाउने भएको छ । जनजाति पुरुषबाट रामबहादुर थापा मगर र कुलभक्त शाक्य, खस आर्य महिलाबाट पद्मा अर्याल, टुकाभद्रा हमाल र यशोदा कुमारी बराल (पिछडिएको क्षेत्र) को नाम टुंगो लगाएको छ ।

खस आर्यतर्फ पुरुषमा गुरुप्रसाद बराल र पुष्पराज कँंडेल, थारु कृपाराम राना(पुरुष), दलित महिला्तर्फ विष्णुमाया बिके, निता घतानी, मधेसी महिलातर्फ रिङ्ला यादव र यशोधाकुमारी यादव छन् ।

त्यसैगरी, मधेशी पुरुषतर्फ चन्द्रेश्वर मण्डल र मुस्लिम महिलाबाट साजिदा सिद्दीकीलाई एमालेले समानुपातिक सांसदमा पठाउने निर्णय गरेको छ ।