रवि र बालेनलाई पाकिस्तानका प्रधानमन्त्रीको बधाइ, द्विपक्षीय सम्बन्धलाई थप सुदृढ बनाउन तयार

काठमाडौं । राष्ट्रिय स्वतन्त्र पार्टी(रास्वपा)ले निर्वाचनमा करिब दुईतिहाई बहुमत प्राप्त गरेपछि बिभिन्न देशका सरकार प्रमुखले उक्त पार्टीका सभापति रवि लामिछाने र बरिष्ठ नेता बालेन्द्र साहलाई बधाइ दिन थालेका छन् ।

यसैक्रममा पाकिस्तानका प्रधानमन्त्री शहबाज शरीफले राष्ट्रिय स्वतन्त्र पार्टीका सभापति रवि लामिछाने र वरिष्ठ नेता बालेन शाहलाई टेलिफोन गरी हालैको आम निर्वाचनमा प्राप्त सफलताका लागि बधाई दिएका छन् ।

शरीफले रास्वपाले हासिल गरेको उल्लेखनीय चुनावी सफलतालाई नेपाली जनताले नयाँ, ऊर्जाशील र गतिशील नेतृत्वप्रति देखाएको विश्वासको प्रतीक भएको बताएका छन् ।
पाकिस्तानी प्रधानमन्त्रीको बधाई सन्देशमा नेपाल–पाकिस्तानबीचको ऐतिहासिक मित्रता, आपसी सम्मान र सहकार्यलाई अझ मजबुत बनाउँदै अगाडि बढ्न आफूहरू इच्छुक रहेको उल्लेख गरिएको पाकिस्तानी राजदूतावासले जनाएको छ ।

शरीफले नवनिर्वाचित नेपाली सरकारसँग नजिकबाट सहकार्य गर्दै द्विपक्षीय सम्बन्धलाई थप सुदृढ बनाउन पाकिस्तान तयार रहेको सन्देशसमेत दिएका छन् ।
यसअघि भारतका प्रधानमन्त्री नरेन्द्र मोदीले पनि टेलिफोनमार्फत लामिछाने र बालेनलाई चुनावी सफलताका लागि बधाई तथा शुभकामना दिएका थिए ।