सर्लाही–४ मा ‘हाइभोल्टेज’ भिडन्त : थापाको मधेश इन्ट्री, सिंहको आत्मविश्वास र शिवपूजन परिवारको अंकगणित

सर्लाही । मधेशको चुनावी नक्सामा यसपटक सर्लाही–४ सबैभन्दा बढी चासोको केन्द्र बनेको छ । कारण—गगन थापाको अप्रत्याशित मधेश प्रवेश । काठमाडौं–४ बाट लगातार जित निकाल्दै आएका थापा यसपटक सिधै तराई झरेपछि राष्ट्रिय राजनीतिदेखि स्थानीय चौतारीसम्म बहस सुरु भएको छ ।

सभापति बनेपछि संगठनात्मक रूपान्तरणको एजेन्डा अघि सारेका थापाले सर्लाही–४ रोज्नुलाई कांग्रेसभित्र र बाहिर दुवैतर्फ अर्थपूर्ण रूपमा हेरिएको छ । तर मधेशको सामाजिक बनावट, स्थानीय भाषा र पुराना शक्ति–समीकरण उनको लागि सहज बाटो भने देखिँदैन ।

पुराना बिजेताको आत्मविश्वास

यस क्षेत्रमा लगातार तीन चुनाव जितिसकेका अमरेशकुमार सिंह यसपटक राष्ट्रिय स्वतन्त्र पार्टी (रास्वपा) को झन्डामुनि मैदानमा छन् । २०७९ मा स्वतन्त्र उठेर २० हजार १७ मत ल्याउँदै जितेका सिंहले अहिले पार्टीको संगठन साथमा रहेकाले आफू अझ बलियो भएको दाबी गरिरहेका छन् ।

अघिल्ला निर्वाचनमा कांग्रेसकै उम्मेदवारका रूपमा जितेका उनले पछिल्लो पटक बागी बनेर पनि परिणाम आफ्नो पक्षमा पारेका थिए । त्यसैले अनुभव र व्यक्तिगत प्रभाव उनको बलियो पक्ष मानिन्छ ।

‘भोट बैंक’को चर्चा र नयाँ समीकरण

समीकरणलाई रोचक बनाउने अर्का पात्र हुन् शिवपूजन राय यादव । उनको प्रभाव क्षेत्रीय रूपमा बलियो मानिन्छ । उनका छोरा अमनिशकुमार यादव नेकपा (एमाले)बाट उम्मेदवार बनेपछि मतविभाजनको बहस चर्किएको छ । बजारमा करिब १४ हजार मत उनको प्रभावमा रहेको चर्चा छ ।

बहुकोणीय प्रतिस्पर्धामा २५ हजार हाराहारी मतले जित तय हुने अनुमान भइरहँदा शिवपूजन परिवारको भूमिका निर्णायक बन्नसक्ने विश्लेषण भइरहेको छ ।

५१ वडाको अंकगणित

सर्लाही–४ मा धनकौल, रामनगर, बलरा, बरहथवा, विष्णु र बसबरिया गरी ५१ वडा पर्दछन् । कुल मतदाता संख्या करिब १ लाख २५ हजार छ ।

स्थानीय तहको नतिजा हेर्दा कांग्रेसको संगठनात्मक आधार कमजोर छैन । बलरा नगरपालिकामा ६ वडाध्यक्ष कांग्रेसका छन् । धनकौल र विष्णु गाउँपालिकामा पनि कांग्रेस नेतृत्व छ । केही वडाध्यक्ष पछिलो समय कांग्रेस प्रवेश गरेपछि थापाको टिम उत्साहित देखिन्छ ।

तर गोडैता, रामनगर र अन्य पालिकामा जसपा, माओवादी केन्द्र तथा एमालेको प्रभाव कायम छ । त्यसैले परिणामलाई एकतर्फी भन्न सकिने अवस्था छैन ।

‘परम्परागत गढ’ मा प्रतिष्ठाको प्रश्न

सर्लाही–४ लाई विगतमा कांग्रेसको आधार क्षेत्र मानिन्थ्यो । २०४८ देखि २०५६ सम्मका निर्वाचन महन्थ ठाकुरले जितेका थिए । समयसँगै शक्ति सन्तुलन फेरिँदै गयो र अमरेश सिंहको उदय भयो ।

अब भने कांग्रेस सभापति स्वयं मैदानमा उत्रिएपछि यो क्षेत्र ‘प्रतिष्ठाको लडाइँ’ मा बदलिएको छ । कांग्रेस उपसभापति विश्वप्रकाश शर्माले थापाको उम्मेदवारीलाई मधेशप्रतिको सम्मानको सन्देश भनेका छन् ।

एकातर्फ अनुभवसहितका सिंह, अर्कातर्फ स्थानीय प्रभाव बोकेको शिवपूजन परिवार र बीचमा राष्ट्रियस्तरको अनुहार थापा, यी तीन ध्र्र्रुवबीचको टक्करले सर्लाही–४ लाई यसपालिको सबैभन्दा ‘हाइभोल्टेज’ निर्वाचन क्षेत्र बनाएको छ । अब अन्तिम फैसला मतपेटिकाले नै गर्नेछ ।