बाटो खुलाउन वा चुनाव सार्न नाम्खा गाउँपालिकाको पत्र

काठमाडौं । हुम्लाको नाम्खा गाउँपालिका ६ लिमीका बासिन्दालाई आगामी निर्वाचनमा मतदान गर्न भौगोलिक विकटता र प्रतिकूल मौसमले ठुलो चुनौती खडा गरेको छ ।

वडा अध्यक्ष पाल्जोर तामाङले जिल्ला निर्वाचन कार्यालय सिमकोटलाई दुईवटा छुट्टाछुट्टै पत्र लेख्दै मतदाताहरूलाई मतदान केन्द्रसम्म पुग्ने वातावरण मिलाइदिन वा निर्वाचनको मिति सार्न औपचारिक अनुरोध गरेका छन् ।

आगामी फागुन २१ गतेका लागि तय गरिएको निर्वाचनमा सहभागी हुन धेरैजसो मतदाताहरू हाल जिल्ला बाहिर छन्, तर गाउँ फर्कने मुख्य मार्गमा पर्ने ५२०० मिटर उचाइको न्यालु लेक भारी हिमपातका कारण बन्द रहेको छ ।

कुल ६७२ मतदाता रहेको नाम्खा–६ लिमीमा तीनवटा मतदान स्थलहरू तोकिएका छन् । यद्यपि, यहाँका अधिकांश मतदाताहरू जाडो छल्न काठमाडौं, सुर्खेत र भारतलगायतका स्थानमा गएकाले बाटो नखुलेमा मत नखस्ने सम्भावना रहेको वडा अध्यक्ष तामाङले बताएका छन् ।

वडा कार्यालयले पठाएको पत्रमा एकातिर बन्द रहेको सडक र न्यालु लेकको हिउँ पन्छाउन सम्बन्धित निकायहरूसँग समन्वय गरिदिन आग्रह गरिएको छ भने अर्कोतिर प्रतिकूल मौसम र भौगोलिक कठिनाइका कारण मतदाता आउन नसक्ने अवस्था भएमा उक्त वडाको निर्वाचन दोस्रो चरणको मितिमा सारिदिन सिफारिस गरिएको छ ।

हुम्लाको उत्तरी हिमाली क्षेत्रमा पर्ने लिमीमा हिउँदको समयमा आवतजावत प्रायः ठप्प हुने गर्दछ । यस्तो अवस्थामा समयमै सडक खुलाउन सरकारले पहल नगरे वा निर्वाचनको समय हेरफेर नभए धेरै नागरिक आफ्नो संवैधानिक मताधिकार प्रयोग गर्नबाट वञ्चित हुने देखिएको छ ।