इरानी प्रदर्शनकारीलाई ट्रम्पको समर्थन– थप मद्दत गर्ने प्रतिबद्धता

काठमाडौं । अमेरिकी राष्ट्रपति डोनाल्ड ट्रम्पले इरानमा सरकारविरोधी प्रदर्शन गरिरहेका नागरिकलाई खुला समर्थन जनाउँदै सहयोग आउँदै गरेको बताएका छन् ।

उनले इरानी अधिकारीहरूसँग हुने भनिएको भेटवार्ता रद्द गर्दै प्रदर्शनकारीहरूको पक्षमा उभिने स्पष्ट सन्देश दिएका हुन् ।

ट्रम्पले सामाजिक सञ्जाल ट्रुथ सोशलमा लेख्दै इरानी प्रदर्शनकारीलाई आन्दोलन जारी राख्न आह्वान गरेका छन् ।

उनले लेखेका छन्, ‘इरानी देशभक्तहरू, प्रदर्शन जारी राख्नुहोस्, आफ्ना संस्थाहरू कब्जा गर्नुहोस्, मद्दत आउँदैछ ।’

यसैबीच, ट्रम्पले इरानी सरकारले सरकारविरोधी प्रदर्शनकारीलाई फाँसी दिएमा कडा कारबाही गर्ने चेतावनी पनि दिएका छन् ।

सीएनएनसँगको अन्तर्वार्तामा उनले भने, ‘यदि उनीहरूले यस्तो गरे, हामी धेरै कडा कारबाही गर्नेछौँ ।’

इरानमा जारी आन्दोलनले मानवीय संकटको रूप लिँदै गएको छ ।