बिभाजनको ४ बर्षपछि कमल थापा राजेन्द्र लिङ्देनसँग एकता गर्न तयार, १६ गते घोषणा सभा

काठमाडौं । राष्ट्रिय प्रजातन्त्र पार्टी (राप्रपा) र राष्ट्रिय प्रजातन्त्र पार्टी नेपालबीच एकता हुने भएको छ ।

चार बर्षअघि २०७८ मंसिर १९ गते राजेन्द्र लिङ्देनसँग राप्रपा अध्यक्षमा पराजीत भएपछि पार्टी बिभाजन गरी २०७८ फागुन ७ गते औपचारिक रुपमा राप्रपा नेपाल पार्टी घोषणा गरेका कमल थापा ४ बर्षपछि पुनः एकतामा आएका छन् । ४ बर्षपछि कमल थापा र लिङ्देनबीच एकता गर्ने सहमति भएको छ ।

राप्रपाका अध्यक्ष राजेन्द्र लिङ्देन र राप्रपा नेपालका अध्यक्ष कमल थापाले एकतासम्बन्धी दस्तावेजमा बुधबार हस्ताक्षर गरेका छन् । दुवै दलबीच लामो समयदेखि चल्दै आएको एकतासम्बन्धी छलफलले अन्ततः औपचारिक रूप पाएको हो ।

सहमतिपछि जारी संयुक्त विज्ञप्तिमा देशको विद्यमान राजनीतिक अवस्थालाई ध्यानमा राख्दै राष्ट्रवादी शक्तिहरूलाई एकताबद्ध गर्नु समयको माग भएको उल्लेख गरिएको छ ।

एकताको औपचारिक घोषणा यही पुस १६ गते काठमाडौंस्थित राष्ट्रियसभागृहमा आयोजना हुने विशेष समारोहमार्फत गरिने जनाइएको छ ।
कार्यक्रममा दुवै दलका शीर्ष नेताहरू, केन्द्रीय सदस्य तथा कार्यकर्ताको उल्लेख्य उपस्थिति रहनेछ ।