प्रधानमन्त्रीको सचिवालयका १४ जना हटाइए, आदर्श श्रेष्ठ यथावत

काठमाडौं । प्रधानमन्त्री सुशीला कार्कीेको सचिवालयमा राखिएका १४ जना कर्मचारी हटाइएका छन् ।

प्रधानमन्त्रीको सचिवालयमा २० जना राखिएकोमा १४ जनालाई हटाइएको छ । प्रमुख स्वकीय सचिव आदर्श श्रेष्ठले उनकी श्रीमती संगीता श्रेष्ठसहित आफन्त प्रधानमन्त्री सचिवालयमा राखेको समाचार बाहिरिएपछि १४ जनालाई हटाइएको छ ।

अब प्रधानमन्त्रीको सचिवालयमा मुख्य सल्लाहकार १, जनसम्पर्क सल्लाहकार १, प्रमुख स्वकीय सचिव १, प्रेस संयोजक १, स्वकीय शाखा अधिकृत (फोटोग्राफर) १ र जनस्वास्थ्य विज्ञ (अवैतनिक) १ गरी जम्मा ६ जनामा सीमित भएको छ ।

बाँकी सबै पदको नियुक्ति आगामी मंसिर ११ गतेदेखि लागू हुनेगरी खारेज भएको छ । यसअघि प्रधानमन्त्री कार्कीले २० जना सचिवालय बनाएर काम गरेकी थिइन् ।

पछिल्लो पटक सचिवालयमा निकटवर्तीहरूलाई नियुक्त दिएको विषय बाहिरिएपछि विवाद भएको थियो । १४ जना हटाए पनि प्रधानमन्त्रीको सचिवालयबाट सर्वाधिक विवादमा आएका आदर्श श्रेष्ठलाई भने यथावत राखिएको छ ।