पूर्वराष्ट्रपति विद्या भण्डारीलाई पार्टीमा फर्काइनेछ : इश्वर पोखरेल

काठमाडौं । नेकपा(एमाले)का वरिष्ठ उपाध्यक्ष ईश्वर पोखरेलले आगामी महाधिवेशनका लागि अध्यक्ष पदमा उम्मेदवारी घोषणा गर्दै पूर्वराष्ट्रपति विद्या भण्डारीलाई पार्टीमा फर्काउने बताएका छन् । अध्यक्षमा उम्मेदवारी घोषणा कार्यक्रममा उनले भण्डारीलाई पार्टीमा फर्काउने प्रतिबद्धता प्रकट गरेका हुन् ।

मंगलबार पोखरेलले ११ औँ महाधिवेशनका लागि उम्मेदवारी घोषणा गरेका छन् ।

पोखरेलद्धारा जारी वक्तव्य भनिएको छ– ‘चार दशक भन्दा लामो अवधि पार्टी निर्माणमा योगदान गर्नुभएका पार्टीका पूर्व उपाध्यक्ष विद्यादेवी भण्डारीले राष्ट्रपति जस्तो गरिमामय राजकीय जिम्मेवारी सफलतापूर्वक सम्हालिसकेपछि आफ्नो अनुभव र ऊर्जा पार्टी काममा फर्किएर खर्चिने चाहना राख्नु खुसी र गौरवको विषय हो ।

‘पार्टीप्रतिको आस्था र विचार, सिद्धान्त एवं नीतिहरूप्रति प्रतिबद्ध हुँदाहुँदै उहाँलाई पार्टी सदस्य हुनबाट वञ्चित गरिदा पार्टीलाई वैचारिक रूपले थप सशक्त, साङ्गठनिक ढङ्गले अझ एकताबद्ध र सुदृढ बनाउने कुरामा असर पर्छ ।’

भण्डारीको पार्टीप्रतिको आस्था र विचार, सिद्धान्त एवं नीतिहरूप्रति प्रतिबद्ध हुँदा हुँदै पार्टी सदस्य हुनबाट वञ्चित गरिँदा पार्टीलाई वैचारिक रूपले थप सशक्त, साङ्गठनिक ढङ्गले अझ एकताबद्ध र सुदृढ बनाउने कुरामा असर गर्ने उल्लेख गरिएको छ ।

‘तसर्थ उहाँलाई पार्टी काममा फर्कने वातावरण निर्माण गरिनुपर्छ, गरिनेछ’, वक्तव्यमा भनिएको छ ।