चीनभन्दा पहिला दलाई लामाले दिए प्रधानमन्त्री कार्कीलाई बधाई

काठमाडौं । जेनजी पुस्ताको आन्दोलनपछि गठन भएको सुशीला कार्की नेतृत्वको सरकारलाई भारत र बंगलादेशले बधाइ तथा शुभकामना दिएका छन् । अर्को विशाल छिमेकी चीनले कार्की नेतृत्वको सरकारलाई बधाइ तथा शुभकामना दिइसकेको छैन । चीन भन्दा अगाडि कार्की नेतृत्वको सरकारलाई तिब्बती धर्मगुरु दलाई लामाले बधाइ दिएका छन् ।

यसअघिका नेपालमा गठन भएका कुनै पनि सरकारलाई दलाई लामाले बधाइ दिएका थिएनन् । तर कार्की नेतृत्वको सरकारलाई भने लामाले गठन भएको भोलिपल्टै शनिबार बधाइ दिएको समाचार भारतीय मिडियाले सार्वजनिक गरेका छन् । एक चीन नीतिप्रति नेपाल सधैं अडिग रहेको परिप्रेक्ष्यमा नवनियुक्त प्रधानमन्त्री कार्कीलाई दलाई लामाको बधाइ आउनुलाई अर्थपूर्ण रुपमा लिइएको छ ।

अमेरिकी एनजीआले फन्डिङ गरेको हामी नेपाल भन्ने संस्थाका सुधन गुरुङलाई जेनजी पुस्ताको प्रदर्शनको कमाण्डरको रुपमा प्रस्तुत गरिनु, गुरुङले काठमाडौंका मेयर बालेन साहका सल्लाहकार ओमप्रकाश अर्याललाई वार्तामा अगाडि सार्नु र उनले सुशीला कार्कीलाई प्रधानमन्त्रीका रुपमा अगाडि सार्नुलाई संयोगमात्र त होइन कि भन्ने आशंका ब्याप्त छ ।

दलाई लामाले नवनिवयुक्त अन्तरिम प्रधानमन्त्री कार्कीलाई बधाई तथा शुभकामना दिंदै भनेका छन्–‘नेपालको यो चुनौतीपूर्ण समयमा नेपाली जनताको आशा र चाहाना पूरा गर्न सफलताको शुभकामना व्यक्त गर्दछु ।’

नेपाल र तिब्बतीहरूको ऐतिहासिक रूपमा मित्रवत सम्बन्ध भएको पनि लामाले उल्लेख गरेका छन् ।