दार्चुलाको नौगाड दुर्घटनाः बेपत्ता यात्रुहरुमध्ये २ जनाको शव फेला

काठमाडौं । दार्चुला जिल्लाको नौगाड गाउँपालिका–५ सौकेबगरस्थित भित्री सडकखण्डमा सोमबार भएको अटो दुर्घटनामा परी बेपत्ता भएका यात्रुहरुमध्ये २ जनाको शव सशस्त्र प्रहरीले फेलापारेको छ ।
होपरीगाडबाट मसिनेबगरतर्फ जाँदै गरेको म १ ह ११४८ नम्बरको अटो गति अनियन्त्रित भई सडकबाट करीब ५० फिट तल नौगाड खोलामा खसेको थियो ।

अटोमा सवार ५ मध्ये सोही ठाउँ बस्ने १२ बर्षीया आरुषा धामीको शव घटनास्थलबाट करिव ७ मिटर पश्चिम र १७ बर्षीया भागा धामीको शव करिव ७ किलोमिटर पश्चिमबाट सशस्त्र प्रहरी बल, नेपाल चमेलीया जलविद्युत सुरक्षा वेश बलाँच, नेपाल प्रहरी, जलविद्युतका कर्मचारी र स्थानीय बासिन्दाहरुले खोजी कार्य गर्ने क्रममा फेलापारेको छ । बेपत्ता ४७ बर्षीया चाखुरी देवी धामीको खोजी कार्य भइरहेको छ भने अटो चालकालाई प्रहरीले नियन्त्रणमा लिएको छ ।

दुर्घटनामा परी घाइते भएका सोही ठाउँ बस्ने १६ बर्षीय आयुष भुललाई उपचारको लागि गोकुलेश्वर अस्पतालतर्फ पठाएको छ ।

दुर्घटनाबारे जानकारी पाउनासाथै सशस्त्र प्रहरी बल, नेपाल चमेलिया जलविद्युत सुरक्षा वेश बलाँचबाट सशस्त्र प्रहरी नायव निरीक्षक दलजित सिहं डोबालको कमाण्डमा विपद् व्यवस्थापन तालिम प्राप्त सुरक्षा फौज बेपत्ताहरुको खोजीकार्यको लागि खटिएको थियो ।