सहरी बिकास मन्त्रालयका सरुवामा बिचौलियाको चलखेल

काठमाडौं । सहरी विकास मन्त्रालयका प्रवक्ता नारायणप्रसाद मैनाली मन्त्रालयमा प्रवक्ताको भूमिकामा भन्दा सरुवा बढुवाका बिचौलियाको भूमिकामा बढी सक्रिय भएको गुनासा मन्त्रालयका कर्मचारीहरुले गर्न थालेका छन् ।

मन्त्रालयले केही दिनमै ठूलो संख्यामा आयोजना प्रमुख तथा डिभिजन इञ्जिनियरहरुको सरुवा गर्दैछ । यसमा मैनालीले अस्वभाविक चासो देखाएका छन् । उपप्रधान तथा सहरी विकासमन्त्री प्रकाशमान सिंहको स्वकीय सचिवालयमा कार्यरत दुई व्यक्तिसँग मिलेर मैनालीले सरुवाको सूची बनाउन गृहकार्य सुरु गरेका छन् ।

मन्त्रालयले सरुवाको सूची बनाउन गृहकार्य गर्नु स्वाभाविक हो । तर मैनालीको भूमिका यतिमा मात्र छैन, उनले सरुवा गर्न चाहेका तथा सरुवा थमौती गर्न चाहेका आयोजना प्रमुख तथा डिईहरुलाई बोलाएर गोप्यरुपमा डिल गर्ने गरेका छन् ।

मन्त्रालयका एक कर्मचारी भन्छन्– ‘अहिले उहाँको काम डिई तथा आयोजना प्रमुखहरुसँग गोप्य डिल गर्ने र त्यसको सूचना मन्त्रीको स्वकीय सचिवालयमा कार्यरत दुई व्यक्तिलाई उपलब्ध गराउनु हो । केही व्यक्तिसँग उनले अग्रिम आर्थिक लाभ लिने गरेको आरोप उनीमाथि लागेको छ ।

सिता गुरुङ सहरी विकास मन्त्री हुँदा मैनाली गुरुङको सचिवालयमा बसेका थिए । त्यतिबेला उनले मोरङ आयोजना कार्यालयका कर्मचारीहरुबाट पैसा उठाएका थिए । त्यतिबेला यो सूचना मन्त्री गुरुङसम्म पुगेका थियो । पछि गुरुङ मन्त्रीबाट हटिन् । यो विषय सामसुम भयो । त्यतिबेला मैनाली उपसचिव थिए । सहसचिवमा बढुवा भएपछि उनको पहिलो आँखा सहरी विकास मन्त्रालयमै रह्यो ।

नेपाली कांग्रेसका नेता डा.शेखर कोइरालालाई भन्न लगाएर उनी सहरीमा आउन सफल भए । सहरीमा आउनका लागि मन्त्रालयमा कार्यरत सहसचिव बिनु बज्राचार्यलाई प्रदेशमा सरुवा गर्न चाँजोपाँजो मिलाए । ‘त्यहाँँबाटै बेथिति सुरु भयो । अहिले सहरी विकास मन्त्रालयमा बेथिति चरम अवस्थामा छ’ एक कर्मचारी भन्छन् । मन्त्रालयमा बेथिति यति बढेको छ कि, अहिले मन्त्रालयका दर्जनभन्दा बढी उपसचिव बरण्डामा थन्किएका छन । मैनालीलाई खुशी नगराउँदासम्म ती उपसचिवहरुले काम पाउने स्थिति छैन ।

मन्त्रालयमा कार्यरत कर्मचारीहरुका लागि बैदेशिक भ्रमणको अवसर आयो भने मैनालीले आफूनिकट कर्मचारीलाई मात्र त्यस्तो अवसर दिलाउने गर्छन् । यसबाट कसैले पटक–पटक अवसर पाउने गरेका छन् भने कसैले एक पटक पनि अवसर पाउने गरेका छैनन् । उनले आफूलाई लाभ दिने कर्मचारीलाई दोहो¥याई तेहे¥याई बिदेश भ्रमणको अवसर दिलाउने काम गरेका छन् । स्रोत भन्छ– मन्त्रालयमा कार्यरत केही महिला कर्मचारीहरुले केही निकट साथीहरुसँग आफूमाथि मैनालीबाट ‘ह्यारेस्मेण्ट’ भएको गुनासो गरेका छन् तर यो विषय सचिव र मन्त्रालयका अन्य माथिल्लो कर्मचारीसँग भन्ने साहस गर्न सकेका छैनन् । किनभने मन्त्रालयका सचिव गोपालप्रसाद सिग्देल आजभोलि निकै निरीह भएका छन् ।

मन्त्रालयका अर्का एक कर्मचारीले भने–‘सहरी विकास मन्त्री र सचिव सिग्देल कमजोर भएको फाइदा उहाँ (मैनाली)ले अत्यधिक उठाइरहनुभएको छ ।’ स्रोत भन्छ, मैनालीले करारमा कार्यरत कर्मचारीहरुको म्याद गर्नुपर्दा समेत आर्थिक लाभ लिने गरेका छन् । आफूलाई मन नपरेका स्थायी कर्मचारीहरुलाई तत्कालै सरुवा गर्न अन्य मन्त्रालयसँग सेटिङ मिलाउने गरेको आरोप समेत उनीमाथि लागेको छ ।